سكرتێری گشتی نەتەوە یەكگرتو،ەكان و ئەمینداری گشتی ئەنجومەنی هاریكاری وڵاتانی كەنداو داوای لێكۆڵینەوەی ورد و خێرا لە ڕوداوی تۆپبارانكردنی سەیرانگەكەیەكی زاخۆ دەكەن.
نەتەوەیەكگرتووەكان لە بەیاننامەیەكدا ڕایگەیاندووە "ئەنتۆنی گۆتێرێز سكرتێری گشتی نەتەوەیەكگرتووەكان سەرەخۆشی لە قوربانیانی ئەو هێرشە دەكات و هیوای چاكبوونەوەی خێرا بۆ بریندارەكان دەخوازێت و دەشڵێت، پێویستە لێكۆلێنەوەی ورد و خێرا لە هێرشەكەی سەر زاخۆ بكرێت تاوەكو لایەنی بەرپرسیار لە پەلامارەكە ئاشكرابكرێت".
هاوكات نایف حەجرەف، ئەمینداری گشتی ئەنجومەنی هاریكاری كەنداویش ئیدانەی هێرشەكەی كرد و ڕایگەیاندوە، وڵاتانی كەنداو بەهەموو شێوەیەك پشتگیری عێراق دەكەن بۆ پاراستنی ئاسایشی وڵاتەكەی و دووبارە نەبونەوەی ئەم دەستدرێژیانە.
پاشنیوەڕۆی چوارشەممە ناوچەیەكی گەشتیاری لە سنوری قەزای زاخۆ تۆپباران كرا و بەهۆیەوە ژمارەیەك گەشتیار كوژران و برینداربوون، سەرجەم بەرپرسانی عێراق و كوردستان سوپای توركیا بەو رووداوە تۆمەتبار دەكەن، وەزارەتی دەرەوەی توركیاش ئەو تۆمەتباركردنەی رەتكردەوە.