لە سنووری تەكیە و شۆڕش و چەمچەماڵ و خان و سەنگاو، دیاردەی لێكردنەوە و بردنی ئاسنی تاوەرەكانی گواستنەوەی وزەی كارەبا سەری هەڵداوە، ئەوەش مەترسی بۆ سەر كارەبای سلێمانی و گەرمیان دروستکردووە.

ئەمڕۆ چوار شەممە ٣ی ئابی ٢٠٢٢، بەڕێوەبەری گواستنەوەی وزەی كارەبای سلێمانی رایگەیاند "ماوەیەكە دووبارە لە سنووری تەكیە و شۆرش و چەمچەماڵ و خان و سەنگاو، دیاردەی لێكردنەوە و بردنی ئاسنی تاوەرەكانی گواستنەوەی وزەی كارەبا سەری هەڵداوەتەوە".

لە سنوری ناحیەی تەكیە بە فیشەك فنجانی تاوەرەكان شكێنراوە و تەلەكانیش بریندار كراون، بەهۆیەوە مەترسی كەوتنی هێڵەكان هەیە كە كارەبا لە وێستگەی غازی چەمچەماڵ بۆ گەرمیان و سلێمانی دەگوازێتەوە، بەكەوتنی ئەو هێڵانە شاری سلێمانی و گەرمیان بێ كارەبا دەبن.

ئەندازیار سامان ئیسماعیل داوا لەلایەنە پەیوەندیدارەكان دەكات بە جدی كار بۆ بنەبڕكردنی ئەو دیاردەیە بكەن كە مەترسی جدیی بۆ سەر تاوەرەكانی كارەبا دروست كردووە.