وەزارەتی پەروەردەی حكومەتی هەرێم ئەمڕۆ لە نووسراوێكدا كە ئاراستەی سەرجەم بەڕێوەبەرایەتیە گشتیەكانی كردووە رایگەیاندووە  "پشكنین بۆ هەمو خوێندكاران ئەنجام بدرێت پێش چونە ژورەوەیان بۆ هۆڵی تاقیكردنەوە، هیچ جۆرە ئامێرێكی ئەلیكترۆنی و زیرەك، كاتژمێری زیرەك و مۆبایل بەهەمو جۆرەكانیەوە رێگەپێدراو نابێت، هەر خوێندكارێكیش ئەو ئامێرانەی لەناو هۆڵی تاقیكردنەوە پێبگیرێت بە گزی تاقیكردنەوەكەی بۆ ئەژماردەكرێت".

هەروەها ئاماژەی بەوەكردوە "سەرپەرشتیار و بەڕێوەبەر و یاریدەدەر و چاودێری هۆڵەكان نابێت بەهیچ شێوەیەك مۆبایل بەرنە ناو ناوەندی تاقیكردنەوە و هۆڵەكانی خوێندن، هەر حاڵەتێكی لەوجۆرە روبدات پێویستە لیژنەی لقی ئەزمونەكان راپۆرتی خۆیان بۆ لیژنەی باڵای ئەزمونەكان بنێرن و وادادەنرێت كە هاوكاری گزی كراوە و دەدرێت بە لیژنەی لێكۆڵینەوە لەسەر ئاستی وەزارەت".

نووسراوەكە ئاماژەی بەوەكردووە "هەر خوێندكارێك رەفتاری نابەجێ بەرامبەر بە ستافی چادێری تاقیكردنەوەكان ئەنجام بدات بێبەش دەكرێت لەتاقیكردنەوە و ئەنجامەكانی، ئەگەر فەرمانبەر یان میلاكی هەر وەزارەت و دامەزراوەیەكی دیكەی حكومەتی هەرێمیش بێت، بەڕێوەبەرایەتی یاسا لە وەزارەت و پەروەردە گشتیەكان، سكاڵای یاسایی لەسەر تۆماردەكات".