ئەمڕۆ پێنجشەممە ئارام حەسەن و شەرمین عەلی هاوسەری بە کەفالەت ئازاد کران.
بەپێی زانیارییەکانی ماڵپەڕی (سپی میدیا)، ئەمڕۆ هەریەکە لە ئارام حەسەن و شەرمین عەلی هاوسەری کەمێک پێش ئێستا بە کەفالەت ئازادکران.
ئارام حەسەن پێشتر بەرپرسی پەیوەندییەکانی دەروازەی پەروێزخان و شەرمین عەلی بەرپرسی راگەیاندنی دەروازەکە بووە و ڕۆژی ٢٦ی مانگی ڕابردوو هەردووکیان لە ماڵەکەی خۆیاندا لە گەڕەکی شەهیدانی کەلار دەستگیرکران.
هەروەها دوێنێش دەزگای ئاسایشی هەرێم رونکردنەوەیەکی لەوبارەیەوە بڵاوکردەوە و ڕایگەیاند" هەردوو ڕاگیراو ( ئارام حەسەن و شەرمین عەلی) هیچ پەیوەندییەکیان بە کاری ڕۆژنامەوانی و ڕێکخراوەی و ئازادی ڕادەربڕینەوە نییە، هەردوو ناوبراو بە فەرمانی دادوەری لێکۆڵینەوە بە ماددەی (٣٤١)ی خراپ بەکارهێنانی دەسەڵات لە یاسای سزادانی عێراقی ڕاگیراون، چونکە فەرمانبەری حکومەتن و هۆکاری دەستگیرکردنەکەیان ڕوونە".