بەڕێوەبەرایەتی ئاسایشی هەولێر رایدەگەیەنێت، ئەمڕۆ شەڕە تەقەی نێوان خاڵ و پورزایەك لەناو بازاڕی قەزای خەبات، بریندارێكی لێكەوتەوە.
ئاسایشی هەولێر لەڕاگەیەندراوێكدا بڵاویكردەوە، ئێوارەی ئەمڕۆ لەقەزای خەبات كێشە لەنێوان ئەندامی بنەماڵەیەكدا دروستبووە كە خالۆزا و پورزای یەكترن لەسەر زەوی كشتوكاڵی بەناوەكانی (بۆتان ئەحمەد روكنەدین و ج، ن، م) و چەك لەشەڕەكەیاندا بەكارهێندراوە.
راگەیەنراوەكە ئاماژەی بەوەكردووە "لەئەنجام بۆتان ئەحمەد روكنەدین بەسەختی بریندار بووە و لەئێستادا گواستراوەتەوە بۆ نەخۆشخانەی فریاكەوتنی هەولێر بەمەبەستی چارەسەركردنی".
هەروەها وتویەتی "كەسی تەقەكەر (ج ،ن ، م) دوای وەرگرتنی ڕەزامەندی دادوەری لێكۆڵینەوەی ئاسایشی هەولێر لەلایەن هێزەكانمانەوە دەستگیر كراوە و ئێستا لەژێر لێكۆڵینەوەدایە".