دەزگای ئاسایشی هەرێم، لەسەر تەقەکردنەکەی دەستگیرکردنی گروپێکی چەکداری نایاسایی ڕادەگەیەنێت "هێزەکانی دەزگای ئاسایشی هەرێم، ئەندامانی گروپێکی چەکداری نایاسایی دەستگیرکرد کە ناویان لەخۆیان نابوو( فەوجە خۆبەخشەکەی گەرمیان). هەروەها دەشڵێت " چەکدارێکی ئەو گرووپە کوژراوە".
لە راگەیاندنەکەی ئاسایشی هەرێم هاتووە "لە ئەنجامی هەوڵەبەردەوامەکانی دەزگای ئاسایشی هەرێم لە پێناو زیاتر چەسپاندنی یاسا و ڕێگریکردن لە هەموو کارێکی نایاسایی و تێکدەرانە و دابینیکردنی ئاسایش و ئارامی، هێزەکانی دەزگای ئاسایش، ئەمڕۆ ٢٠٢٣/٧/١٧ بە فەرمانی دادوەری لێکۆڵینەوە، توانیان دوای ڕووبەڕوبونەوە ئەندامانی گروپە چەکدارە نایاساییەکە دەستگیربکەن، کە ببونە هۆی پشێوی و نائارامی لە ناوچەکە و هەستاون بە خۆنمایشکردن و وەرگرتنی سەرانە و هەڕەشەکردن و تەقەکردن و تۆقاندنی هاوڵاتیان."
لە راگەیاندنەکەی ئاسایشی هەرێمدا ئەوەش خراوەتەڕوو " لە کاتی دەستگیرکردنی چەکدارەکان، ڕووبەڕووی هێزەکانی ئاسایش بونەوە، لە ئەنجامدا دوو کارمەندی ئاسایش برینداربوون کە هیوای زوو چاکبونەوەیان بۆ دەخوازین، لە کاتی ڕوبەڕووبونەوەکەدا دوان لە چەکدارەکان برینداربوون و یەک چەکدار گیانی لەدەستدا".
هەروەها هاتووە " لە ئێستادا بە فەرمانی دادوەر بە ماددەی ١٥٦ لە یاسای سزادانی عێراقی ئەندامانی گروپە چەکدارەکە دەستگیرکراون و ڕووبەڕووی یاسا کرانەوە".