پارێزگاری بانكی ناوەندی عێراق لەبارەی بەرزبوونەوەی نرخی دۆلار روونكردنەوە دەدات و دەڵێت" بەرزبوونەوەی نرخی دۆلار کاتییە و هیچ سزایەکی نوێ نییە".
عەلی عەلاق پارێزگاری بانكی ناوەندی عێراق، ئێوارەی ئەمڕۆ چوارشەممە لە ڕوونکردنەوەیەکدا رایگەیاند" تەنها نرخی دراوی دۆلار لە بازاڕەکاندا بەرزە ئەویش کاتییە و بەهۆی قەدەغەبوونی مامەڵەی سەکۆی ئەلکترۆنییە لە چەند بازرگانێک".
دەشڵێت" بانکی ناوەندی بەردەوامە لە دابینکردنی دۆلار بە نرخی فەرمی
و بۆ هەموو ئەوانەی دۆلار بەرێگای یاسایی دەكڕن و پێویستیان پێیەتی".
ئەوەشی خستەڕوو، هیچ ئاماژەیەك نییە بۆ ئەوەی ئەمریكا بانكی دیكەی عێراقی سزا بدات.
ماوەی زیاتر لە هەفتەیەکە نرخی دۆلارى ئەمریکى لە بازاڕەکانى عیراق و هەرێمى کوردستان بەرامبەر دینارى عێراق بەشێوەیەکى بەرچاو بەرزبووەتەوە، بەجۆرێک لە ئێستادا ١٠٠ دۆلار لەسەروو ١٥٤ هەزار دینار مامەڵەی پێوەدەکرێت کە ئەوەش نیگەرانى هاوڵاتییانى بەدواى خۆیدا هێناوە.