وەزارەتی تەندروستی عێراق رایدەگەیەنێت، تائێستا هیچ حاڵەتێكی تووشبوون بە كۆرۆنای نوێی ناسراو بە (ئەیریس) تۆمارنەكراوە.
سەیف بەدر، وتەبێژی وەزارەتی تەندروستی عێراق رایگەیاندووە "بەهەماهەنگی لەگەڵ رێكخراوە نێودەوڵەتییەكان، كار لەسەر تواناكانی دەستنیشانكردن و چارەسەركردنی گۆڕاوی نوێی كۆرۆنا دەكەین كە لە زۆرێك لە وڵاتانی جیهان سەریهەڵداوە و خۆشبەختانە تا ئێستا هیچ تووشبوونێك بەو گۆڕاوە نوێیە لە عێراق تۆمارنەكراوە".
ناوبراو روونیكردۆتەوە "گۆڕانی بۆماوەیی لە تووشبوون بە ڤایرۆسی كۆرۆنا ئاساییە، بەو پێیەی گۆڕانی بۆماوەیی روودەدات و جۆرێك دەردەكەوێت كە لەهەندێك تایبەتمەندی جیاوازن و رەنگە كەمتر مەترسیداربن لە ڤایرۆسەكانی دیكە، بەڵام نیشانەكانی هەمان نیشانەی كۆڤید 19یان هەیە".
ساڵی 2020 ڤایرۆسی كۆرۆنا بڵاوبووەوە و بەو هۆیەشەوە باری لەناكاوی تەندروستی لەسەرانسەری جیهان ڕاگەیەنرا.