ئەو كچەی كە سەرلەبەیانی ئەمڕۆ لەپردی بەردەم كەمپی نوێی زانكۆی سلێمانی كەوتە خوارەوە و گیانی لەدەستدا ناوی هێلین مەنسورە و كچی بەرپرسێكی دیاری یەكێتی نیشتمانی كوردستانە.
ڕاگەیاندنی ناوەندی كۆمەڵایەتی كەركوك كە وێنەی ئەو كچەیان بڵاوكردۆتەوە و لەپرسەنامەیەكدا بۆ باوكی نووسیویانە " (خاتوو هێلین مەنسور مەحمود خان)مان بیست كە دەكاتە كچی هەڤاڵ (مەنسور مەحمود خان) لێپرسراوی ناوەندی كۆمەڵایەتی پێكھاتەكانی سلیمانی، بەو بۆنەیەوە سەرەخۆشی خۆمان ئاراسەتەی بنەماڵەكەی دەكەین".
بەوتەی بەرپرسانی تەندروستی و ئەمنی سلێمانی كاتژمێر 6ی سەرلەبەیانی ئەمڕۆ ئەو كچە لەسەر پردی پەڕینەوەی بەردەم زانكۆی سلێمانی لەسەر رێگەی راپەڕین كەوتۆتە خوارەوە و گیانی لەدەستداوە.
بەپێی زانیارییەكانی (سپی میدیا) ئەو كچە خوێندكاری بەشی زانستی فیزیا بووە لە زانكۆی سلێمانی و ماڵیان لە گەڕەكی ئیبراهیم ئەحمەدە لە شاری سلێمانی.