بەشی مۆنیتەرینگی بۆردی راگەیاندنی یەكێتیی نیشتیمانیی كوردستان، وەڵامی كۆنگرە رۆژنامەنووسییەكەی سەرۆكی جوڵانەوەی نەوێ دەداتەوە رایدەگەیەنێت: "هەمووان چاوەڕێ بوون دان بە پاشەكشە و شكستەكەتدا بنێیت و داوای لێبوردن لە كەركوكیەكان بكەیت، بەڵام بە پێچەوانەی چاوەڕوانییەوە، ئەوەی لە كۆنگرەكەتدا بەرجەستە بوو، كۆمەڵێك هەڵەی زەق و زانیاری ناڕاست بوو، لە هەمووشی خراپتر بەراوردێك بوو كە پشتت دەبەستێت بە رووداوێكی مێژوویی ئایینی ئیسلام، كە نەدەبوو بیكەی".
هەر لە دەقی وەڵامەكەدا هاتووە": "لەوەش سەیرتر قسەكردنت بوو لەسەر سیستمی سانتلیگۆ، كە بەڕاستی ئەم سیستەمە پسپۆڕی و شارەزایی زۆری دەوێت و كاری جەنابت نەبوو قسەی لەسەر بكەیت و سەر لەخۆت و لەهاووڵاتیانیش بشێوێنی".
بەشی مۆنیتەرینگی بۆردی راگەیاندنی یەكێتیی نیشتیمانیی كوردستان دەڵێت:"ئەوەی لە كاتی بانگەشەی هەڵبژاردن گوێی لە جەنابت و پەیامەكانی راگەیاندنی نەوەی نوێ بووبێت هاوشێوەی پەیامەكانی پێشوتان، تەنها ئەو ووشانەی بیردێتەوە، (شەلاتی، چەقۆكێش، سەرسەری، درۆزن، خوێری، نەعل، قۆنەرە، قەڵەمفرۆش، نەقیزە، كۆیلە، ترسنۆك، تەحەددا دەكەم، ئەمە بۆم هەڵگرن) و كۆمەڵێك ووشەی دیكەی ناشایستە كە بەهیچ شێوەیەك ئەم جنێو و زمانە ساكارە بۆ سەرۆكی حزبێكی نوێ گونجاونین، كە لەبانگەشەی هەڵبژاردنەكانداو لەمەراسیمی فەرمی و لەڕێی میدیای فەرمی حزبەكەی خۆیەوە بڵاویان بكاتەوە.
شاسوار عه‌بدولواحید سه‌رۆكی جوڵانه‌وه‌ی نه‌وه‌ی نوێ، ڕۆژی یەکشەممە له کۆنگرەیەکی ڕۆژنامەوانیدا ڕایگەیاند" سوپاسی یه‌ك به یه‌كی ده‌نگده‌ری نه‌وه‌ی نوێ له كه‌ركوك ده‌كه‌م، ئه‌و ده‌نگده‌رانه‌ی نه پاره‌یان وه‌رگرت له بری ده‌نگه‌كانیان، دڵنیابن هه‌رگیز خیانه‌ت له‌و متمانه‌یه ناكه‌ین كه داوتانه به ئێمه".
وتیشی" (٧٠%)ی كوردی كەركوك بۆ دەنگدان نەچوون، كورد له (٦٠٠) هه‌زار ده‌نگده‌ر نزیكه‌ی (٢٠٠) هه‌زاریان بۆ دەنگدان چوون کە ئەوەش لە بەرژەوەندی حیزبەكانی دەسەڵات بووە".
دەشڵێت" ئه‌و ده‌نگانه‌ی لە کەرکوک بەدەستمانهێناوە نزیكه له ده‌نگی ئەو حزبانەی (٧٠) ساڵه سیاسه‌ت ده‌كه‌ن".
دەقی وەڵامەكە:
وەڵامێكی كورت بۆ كۆنگرەیەكی درێژی رۆژنامەوانی
بۆ: بەڕێز شاسوار عەبدولواحید سەرۆكی جوڵانەوەی نەوەی نوێ
سڵاوێكی گەرم
بەدیقەتێكی زۆرەوە، وەك بینەر كۆنگرە رۆژنامەوانیەكەی جەنابتمان بینی، كۆنگرەیەك (55) دەقیقەی بێ كەم و زیاد قسەت كرد و زۆربەی چاودێرانی سیاسی و میدیاكاران، لە چاوەڕوانی ئەوەدابوون، دان بە پاشەكشە و شكستدا بنێی و داوای لێبوردنێك لە كەركوكیەكان بكەیت، كە بەهۆی ململانێ و ركابەری و بەرژەوەندی حزبییەوە، یەكڕیزی و یەك لیستیت رەتكردەوە و دەنگی كوردت بەفیڕۆدا، بەڵام بە پێچەوانەی چاوەڕوانیەوە، ئەوەی لە كۆنگرەكەتدا بەرجەستە بوو، كۆمەڵێك هەڵەی زەق و زانیاری ناڕاست بوو، لە هەمووشی خراپتر بەراوردێك بوو كە پشت دەبەستێت بە روداوێكی مێژوویی ئایینی ئیسلام، كە نەدەبوو بیكەی، لەوەش سەیرتر قسەكردنت بوو لەسەر سیستمی سانتلیگۆ، كە بەڕاستی ئەم سیستەمە پسپۆڕی و شارەزایی زۆری دەوێت و كاری جەنابت نەبوو قسەی لەسەر بكەیت و سەر لەخۆت و لەهاووڵاتیانیش بشێوێنی، لەوانەش دەگەڕێین و دێینە سەر خستنەڕووی كومەڵێك داتاو ژمارەی نادروست، كە سەرجەمیان لەپێناو تۆمەتباركردنی یەكێتی و داپۆشینی شكستەكەی خۆتان بوو، ئێمە زۆر كاتی خوێنەران ناگرین و تەنها بە چەند خاڵێك هۆكارەكانی شكستی نەوەی نوێ و لیستەكەی جەنابت بیر خۆت و خوێنەران دێنینەوە.
یەكەم: لە بانگەشەی هەڵبژاردنەكاندا هیچ شتێكی تازەت پێ نەبوو بۆ كەركوكییەكان تادەنگت پێ بدەن و متمانەی سەركردایەتیكردنی خەونە نەتەوەییەكان بسپێرن بە جەنابت، بەڵكو تەنها دووبارەكردنەوەی پەیامەكانی پێشووتان بوو، كە پڕ بوون لە دەستەواژەی ناگونجاو بۆ پەیامی سیاسی و بانگەشەی هەڵبژاردن، ئەوەی لە كاتی بانگەشەی هەڵبژاردن گوێی لە جەنابت و پەیامەكانی راگەیاندنی نەوەی نوێ بووبێت هاوشێوەی پەیامەكانی پێشوتان، تەنها ئەو ووشانەی بیردێتەوە، (شەلاتی، چەقۆكێش، سەرسەری، درۆزن، خوێری، نەعل، قۆنەرە، قەڵەمفرۆش، نەقیزە، كۆیلە، ترسنۆك، تەحەددا دەكەم، ئەمە بۆم هەڵگرن) و كۆمەڵێك ووشەی دیكەی ناشایستە كە بەهیچ شێوەیەك ئەم جنێو و زمانە ساكارە بۆ سەرۆكی حزبێكی نوێ گونجاونین، كە لەبانگەشەی هەڵبژاردنەكانداو لەمەراسیمی فەرمی و لەڕێی میدیای فەرمی حزبەكەی خۆیەوە بڵاویان بكاتەوە.
هۆشیاری خەڵك لە رۆژگاری ئێستادا گەیشتۆتە ئاستێك، چیتر ئەو زمانە نابێتە سەرچاوەی متمانەی خەڵك، بەڵكو دەنگدەر لە بانگەشەی هەڵبژاردن چاوەڕوانی بەرنامەی نوێ لەحزبەكان دەكات، نەك پەیامی زبرو جنێوبارانكردنی لایەنی بەرامبەر، بەتایبەتی لەشارێك كە هەموو كوردێكی بێ غەل و غەش بەپرسێكی چارەنووسسازی نەتەوەیی و نیشتیمانی دەزانێت، دەریشكەوت هاوڵاتیان بێزارن لەو جۆرە پەیامە زبرو جنێونامانەو پێشوازی لێناكەن.
دووەم: بڵاوكردنەوەی زانیاری نادروست، كە دەكەوێتە خانەی چەواشەكردنی خەڵكەوە، رەنگە بۆ بانگەشەی هەڵبژاردنێك لە قۆناغێكی دیاریكراو سودی بۆ خاوەن پەیامەكە هەبێت، بەڵام پەندێكی كوردەواری هەیە دەڵێت: (پەتی ناڕاستی كورتە)، بۆیە دووبارەكردنەوەی هەمان سیناریۆ ئامانجی خۆی هەمیشە ناپێكێت. بڕوا بكەن ئەو ئێوارەیەی كە هەڵبژاردنی دەنگدانی تایبەت كۆتایی پێهات، شتێكی چاوەڕوانكراوبوو كە زۆرینەی دەنگە تایبەتەكان لەسنوری كەركوك بۆ یەكێتی بێت، بەڵام بە بەرنامە و رووماڵی میدیاكانتان دەستانكرد بە بڵاوكردنەوەی هەمان سیناریۆی جاران و راتانگەیاند كە لە چەندین وێستگەی هەڵبژاردنەكان یەكێتی یەك دەنگی هێناوە، بەو پەیامە نادروستانە، بەدەمی خۆتان گورزی كەمەرشكێنتان لەخۆتان وەشاندو متمانەی جەماوەرتان لەدەستدا.
بەنموونە زانیاریەكی دیكەی نادروستی كۆنگرە رژنامەوانییەكەی جەنابت، ئەو زانیارییە نادروستە بوو، كە هۆكاری سەرەكی ئەم نامەی ئێمەیە، گوایە یەكێتی لەبانگەشەی هەڵبژاردنی كەركوك (١٠٠) ملیۆن دۆلاری خەرجكردووە بۆ دژایەتی نەوەی نوێ. مەبەست لەدژایەتی واتە لەرێی راگەیاندنەوە یەكێتی ئەو هەموو پارەیەی بۆ دژایەتی جەنابتان بەهەدەر داوە، ئەم زانیاریە ١٠٠% نادروستەی جەنابت دەیهێنێ هەموو خەڵكی كوردستانی لەپێناو بكەین بە شایەد و داوەر، چونكە باش دەزانن كە میدیای فەرمی یەكێتی (رادیۆ، تەلەفزیۆن، رۆژنامە) لەبانگەشەی هەڵبژاردنی ئەمجارە نەك دژایەتی ئێوەی نەكردووە، بەڵكو نە بە باشەو نە بەخراپە لەدرێژایی بانگەشەی هەڵبژاردن ناوی جەنابت و نەوەی نوێی نەهێناوە، كەخەوت بەوەوە دەبینی بۆ یەك جاریش بێت ناوت بێنین، بەڵام ناوهێنانی جەنابت لەپلانی ئێمەدا نەبوو، بۆیە لەسەر شكستی خۆتان گلەیی لەئێمە مەكەن، گلەیی لە خۆتان بكەن، هەروەك دیسانەوە گلەیی لە خۆتان بكەن و لە هێزی پێشمەرگەی كوردستان مەكەن، چونكە پێشمەرگە چۆن چاوی تیژە بۆ دوژمن، بەو ئەندازەش بۆ دەنگدان بیری تیژە و بیریان ناچێتەوە كە لە رۆژگاری شەڕی تیرۆرستانی داعشدا و بۆ ماوەی دوو مانگ شەهیدەكانتان بە تەنیشت تیرۆرستانەوە بە كوژراو ناودەبرد، خۆ ئەگەر هەڕەشەی خۆپیشاندانی پێشمەرگە دێرینەكان و وەزارەتی پێشمەرگە و رۆشنبیری نەبوایە لەسەر هەمان رەفتار و روماڵ بەردەوام دەبوون، كەوایە دڵنیابە تا خاوەنی ئەم جۆرە پەیامە جنێونامەو زانیارییە نادروستانەبن، دەبێ لەهەڵبژاردنی داهاتووی پەرلەمانی كوردستاندا چاوەڕوانی شكستێكی گەورەتر بكەن.
ئەوكاتە تۆمەتی قەڵەمفرۆشی ناخەیتە پاڵ ئەو رۆنامەنووسانەی كەنزیكەی دوومانگە لەشنگالەوە تاخانەقین، بەتایبەتی لەكەركوك سەرقاڵی كوكردنەوەی دەنگ بوون بۆ كوردو بۆ ئایندە و چارەنووسی كەركوك كە تا ئێستا لەو ماوەدرێژەدا، بەروحیەتێكی پیشمەرگانە كاردەكەن و نەموچەیان وەرگرتووەو نە پاداشتكراون، بەڵكو لەدوای كۆتاییهاتنی هەڵبژاردنی پەرلەمانی كوردستان لەكۆنگرەیەكی رۆژنامەوانی دیكەدا بەقوڵی بیردەكەیەوەو ئەمجارە دەستی خەتاباری بۆ ئەو قەڵەمانە درێژدەكەیت كەسەربەخۆتن و بەردەوامی زانیاری ناراست و پەیامی زبرو ناشایستە و جنێونامە ئامادە دەكەن و دەیخەنە بەردەم جەنابت و تۆش بەبێ سێو دوو قۆڵی لێ هەڵدەماڵی و بەحەماسەتێكی زۆرەوە و بەشێوەی سیناریۆ شاشەی تەلەفزیۆنی خۆتانی پێ گەرم دەكەیت، بۆیە لە هەڵبژاردنی داهاتودا كار لە كار دەترازێت، بەڵام جیوازییەكە ئەوە دەبێت كەئەمجارە گلەی لەخۆت و لەقەڵەمەكانی خۆتان دەكەیت نەك لە ئێمە.
سەرچاوەیەك لە مۆنیتەرینگی بۆردی راگەیاندنی یەكێتیی نیشتیمانیی كوردستان.
سلێمانی
٢٥/١٢/٢٠٢٣