کەشناسێکی دیاری عێراق پێشبینییەکانی کەشوهەوای چەند ڕۆژی داهاتووی بڵاوکردەوە و ئاماژە بەوە دەکات کە شەپۆلێکی سەرمای توند ڕوو لە وڵات دەکات.
سادق عەتیە شارەزای بواری کەشناسی، لە پۆستێکیدا لە تۆڕی کۆمەڵایەتی فەیسبوک ڕایگەیاندووە" لە ئەنجامی کاریگەری بارودۆخێکی کەشوهەوای لاواز و خێرا لە ئێوارەی ڕۆژی سێشەممەوە پێشبینیدەکرێت شەپۆلێکی بارانبارین بەشێوەی نمە باران ڕوو لە ناوچە جیاجیاکانی عێراق بکات".
ئاماژەی بەوەشکردووە، لە بەرەبەیانی ڕۆژی چوارشەممە و پێنجشەممەوە لە ناوچەکانی ناوەڕاست و باشووری عێراق خێرایی با (٥٠) کم لە کاتژمێرێکدا زیاد دەکات.
ئەوەشی خستەڕوو، لە شەوی چوارشەممەی ئەم هەفتەیەوە شەپۆلێکی بارانبارین و سەرمای توند ڕوو لە سەرجەم ناوچەکانی عێراق و هەرێم دەکات و تا بەیانی ڕۆژی پێنج شەممە بەردەوام دەبێت.
ئەو کەشناسەی عێراق پێشبینیش دەکات، کاریگەری لەسەر هەموو شارەکان دەبێت و بۆ چەند ڕۆژێک بەردەوام دەبێت، بەتایبەتی کاریگەری لەسەر باکور و ڕۆژئاوای وڵات دەبێت.