شارەزایەکی بواری کەشوهەوا ڕایدەگەیەنێت" لە مانگی رەمەزاندا ئەگەری روودانی لافاو بەهۆی بارانبارینی زۆر هەیە".
ئاراس جەبار شارەزای بواری كەشناسی، ئەمڕۆ شەممە لە ڕاگەیەندراوێکدا بڵاویكردەوە" ئەمڕۆ و سبەی تاوەباران و بروسكە بەڕێژەی جیاواز لە ناوچە و شوێنی جیاجیادا دەبێت، ئێوارەی سبەی یەكشەممەش كۆتایی بەو حاڵەتە دێت".
ئاماژەی بەوەشکردووە، رۆژی دووشەممە لەگەڵ یەكەم رۆژی ڕەمەزان، كەشێكی سەقامگیر و وشك ناوچەكانمان دەگرێتەوە، پلەكانی گەرماش بەرزبوونەوەی زیاتر بەخۆیەوە دەبینێت، بە تایبەت لە رۆژی چوارشەممە ١٣ی ئازاری ٢٠٢٤ پێشبینی دەكرێت هەرێمی كوردستان و وڵاتانی ناوچەكە، بكەوێتە ژێر كاریگەری بارستە هەوایەكی گەرمی باكوری ئەفریقا و پلەی گەرما لە سەنتەری پارێزگاكانی هەرێم، بۆ زیاتر لە ٢٠ پلەی سەدی بەرزببێتەوە، لە ناوچەكانی گەرمیانیش بۆ زیاتر لە ٢٥ پلە و ناوچەكانی ناوەڕاست و باشووری عێراق، بۆ زیاتر لە ٢٨ پلە و كەشێكی بەهارە دروست دەبێت و تا ١٧ی ئەم مانگە كاریگەرییەكانی بەردەوام دەبێت .
ئەوەشی خستەڕوو، لە ماوەی نێوان ١٧ بۆ ٢٠ی ئەم مانگە پێشبینیدەكرێت نزمە پاڵەپەستۆی گەرم و شێدارەكانی سەر سوودان و دەریای سوور، چالاك ببنەوە بە ڕووی ناوچەكەدا و شەپۆلێكی بەهێزی بارانبارین و هەورەبروسكە، سەرانسەری ناوچەكانی هەرێمی كوردستان و زۆر لە ناوچەكانی عێراق و سعودیە بگرێتەوە، لە هەندێ ناوچەشدا بارانی بەخوڕ و لافاو دەبێت، لەگەڵ بارینی تەرزەی گەورە، دوابەدوای ئەوە، ئەگەر هەیە لە رۆژانی نەورۆز و بۆ دواتریش یەك دوو شەپۆلی تری بارانبارین لە دەریای ناوەڕاستەوە، ناوچەكانی هەرێم بگرێتەوە كە ئەم شەپۆلانە بارستە هەوای ساردیان لەگەڵ دەبێت و كەشی زستانە دەهێننەوە بۆ ناوچەكە.