یاریدەدەری بەڕێوەبەری بەرنامەی ڕووبەڕووبوونەوەی جگەرەكێشان لە وەزارەتی تەندروستی عێراق ڕایدەگەیەنێت" لە هەر ١٠ خولەكێک جارێكدا، بەهۆی جگەرەكێشانەوە حاڵەتێكی گیان لەدەستدان لە عێراق تۆماردەکرێت"، دەشڵێت" ڕۆژانە ٦ ملیار دینار لە جگەرە کڕین خەرج دەكرێت".
وەسیم گەیلان یاریدەدەری بەڕێوەبەری بەرنامەی ڕووبەڕووبوونەوەی تووتن لە وەزارەتی تەندروستی عێراق، ڕایگەیاند" لە ٢٠٪ی هاوڵاتیانی عێراق جگەرە دەكێشن و نزیكەی لە ٥٠٪ یان بەدەست ئالودە بوون بە جگەرەكێشان دەناڵێنن کە زۆرینەی جگەرەكێشەكان پیاون".
وتیشى" ڕۆژانە تێچووی جگەرە کڕین لەلایەن تەواوی عێراقییەكانەوە دەگاتە ٦ ملیار دینار و پێشبینی دەکەین لە هەر ١٠ خولەك جارێكدا، بەهۆی جگەرەكێشانەوە لە عێراق حاڵەتێکى گیان لەدەستدان تۆمار دەکرێت".
ڕاشیگەیاند" لە ئەنجامی پشکنینەکان بۆمان دەرکەوتووە بوونی ماددە و دەرمانی ژەهراوی لە جگەرە ئاساییەكان و جگەرەی ئەلیكترۆندا هەیە کە جگەرەی ئەلیكترۆنی ١٢٧ مادەی ژەهراویان تێدایە، لە نێویشیاندا ماددەی ڕەساس".