شەوی ڕابردوو ڕابون مەعروف، ئەندامی پەرلەمانی هەرێمی كوردستان، لەبەرنامەی‌ تاوتوێی‌ كەناڵی‌ ئێن ئارتی‌ رایگەیاند كە شەوی یەكشەممە، لەدوای كۆبوونەوەی پەرلەمان لەلایەن فرسەت سۆفی‌‌ و ئومێد خۆشناوەوە ئەشكەنجە دراوە و سوكایەتی‌ پێكراوە.

 

لەبەرامبەردا فرسەت سۆفی پەرلەمانتاری‌ پارتی‌ دیموكراتی‌ كوردستان دەڵێت، "دوێنێ هەرچی لەدەستمان هات كردمان بۆ ڕاگرتنی خەڵك‌و پارێزگاریكردن لەڕابون معروف، خۆمان لەگەڵ پۆلیس ‌و هێزی ئەمنی دیوارمان دروستكردبو، چەندین گرتەی ڤیدیۆیش هەن ئەوە دەسلمێنن، هەر ئەو شەوە خۆم پەیوەندیم كرد بەبەڕێزان سەرۆكی حكومەت ‌و سەرۆكی ئەنجومەنی ئاسایشی هەرێم‌ و كاك سیداد و وەزیری ناوخۆ بۆ ئەوەی تدخلی خێرا بكەن‌ و گیانی ئەو برادەرە سەلامەت بێت‌ و ڕەوشەكە كۆنتڕۆل بكرێت، تا گەیشتە ئەوەی كاك سیداد خۆێ هات".

 

دەشڵێت "كەچی لەكەناڵی nrt دەستی بەجنێو دان‌ و درۆ هەڵبەستن كردوە، من تەنها یەك شتم بەڕابون وتوە كە بێت داوای لێبوردن بكات تا توڕەیی ئەم خەڵكە كەم بێتەوە، لەوە زیاتر هەرشتێكی دیكەی وتبێت نامەردیەكی گەورەیە و ئیتر حەقە ئەم برادەرە ڕێزی خۆی بگرێت‌ و چیتر بەم زمانە پیسەی تۆی دوبەرەكی نەچێنێت".