فراكسیۆنی پارتی دیموكراتی كوردستان لە پەرلەمانی عێراق بڕیاریدا بگەڕێنەوە بەغدا بۆ بەشداریکردن لە كۆبوونەوەكانی پەرلەمانی عێراق.
ئێوارەی ئەمڕۆ چوارشەم 15ی تشرینی دووەم، فراكسیۆنی پارتی بەیاننامەیەكی بڵاو كردەوە و تایدا هاتووە " لە پێگەی بەرپرسیاریەتی و هەستكردن بەو رەوشەی عێراق بە گەل و نیشتیمانەوە لەسەر هەموو ئاستەكان پێیدا تێپەڕ دەبێت و هەروەها لە سۆنگەی بڕوابوونمان بەوە كە گفتوگۆ و لێكتێگەیشتن تەنیا چارەسەری هەموو كێشە و قەیرانەكانە، بڕیارمان دا بگەڕێینەوە و بەردەوام بین لە كاری پەرلەمانی خۆمان شان بەشانی خوشك و براكانی ترمان لە ئەنجوومەنی نوێنەرانی عێراق".
فراکسیۆنی پارتی دەڵێن " كوتلەی پارتی یەكێكە لە گەورە كوتلە پەرلەمانییەكان و پێشتریش هەوڵی داوە بۆ ئەوەی دەستوور یەكلاكەرەوە بێت بۆ چارەسەری سەرجەم كێشەكان، بە تایبەتی كێشە هەڵپەسێردراوەكانی نێوان هەرێم و حكوومەتی ئیتیحادی و گەڕانەوە بۆ بنەمای هاوبەشی نیشتیمانی و تەوافوقی سیاسی و بڕوامان وایە كە ئەگەر دەستوور بە شێوەیەكی دروست جێبەجێ بكرێت ئەوا دەرفەت دەڕەخسێت بۆ هەموو لایەنەكان لەسەر بنەمای ئاشتیانە بگەنە چارەسەر و لەو رێگەیەشەوە پارێزگاری لە بەرژەوەندی هەموو پێكهاتە و لایەنەكانی عێراق بكرێت".
ئەو فراکسیۆنە ئاشکرای دەکەن كە پێویستە هەولێر و بەغدا بە ئاشتی و لەسەر بنەمای دەستوور دەست بە گفتوگۆیەكی ڕژد بكەن بۆ چارەسەركردنی كێشەكان.