بۆ دابەشكردنی بەشە خۆراكی هاوڵاتیان لەئەمساڵدا چاوەڕوانی دوایین وەڵامی وەزارەتی بازرگانی عیراق دەكرێت و بەرێوەبەری كۆمپانیای خۆراكیش لە سلێمانی دەڵێت"برنج و شەكر و زەیتمان بەدەست گەیشتووە و هەركات ئاگادار بكرێینەوە دەست بەدابەشكردنی دەكرێت".
شەوكەت محەمەد، بەرێوەبەری كۆمپانیای خۆراك لەسلێمانی بە تۆڕی هەواڵی سلێمانی رایگەیاندووە "بۆ دابەشكردنی بەشەخۆراكی هاوڵاتیان لەئەمساڵدا چاوەڕوانی دواین وەڵامی هەردوو وەزارەتی بازرگانی عیراق و هەرێمی كوردستان دەكەین كە ئەو بەشە خۆراكانەی دابەش دەكرێت، بەشە خۆراكی مانگی ئابی ساڵی رابردوو یاخود بەشە خۆراكی مانگی كانوونی دووەمی ئەمساڵ دەبێت.
ئاشكراشیكرد، "بڕی پێویست برنج و شەكر و زەیتمان بەدەست گەیشتووە و هەركات ئاگاداربكرێینەوە لەلایەن حكومەتی هەرێم و حكومەتی ئیتحادییەوە دەست بەدابەشكردنی بەشە خۆراك بەسەر هاوڵاتیاندا دەكرێت".
روونیشكردەوە، تائێستا یەكلانەكراوەتەوە كە بەشە خۆراكی هاوڵاتیان و شیری منداڵان كە لەساڵی رابردوودا كەدابەش نەكراوە قەرەبووی هاوڵاتیان دەكرێنەوە یاخود نا.
بەرێوەبەری كۆمپانیای خۆراك تەئكیدیشی كردەوە هەر ڕێنماییەك لەبارەی بەشەخۆراكی هاوڵاتیان و قەرەبووكردنەوەی لەلایەن حكومەتی ئیتحادییەوە دەربكرێت لەهەرێمی كوردستان كاری پێدەكرێت.