دوای ئەوەی پاشەكەوتی مووچە هەڵگیرا ئیدارەی گەرمیان بڕیاری دا لە هەفتەی داهاتووەوە دەوامی فەرمانبەران ئاسایی بكرێتەوە.
دوێنێ بەسەرپەرشتی سەڵاح كوێخا، سەرپەرشتیاری ئیدارەی گەرمیان و یونس ئەحمەد جێگری سەرپەرشتیاری ئیدارەی گەرمیان وبەئامادەبوونی قائیمقامی قەزاكانی كەلار و كفری و بەڕێوەبەری گشتی و بەڕیوەبەری فەرمانگە حكومیەكانی سنوری ئیدارەی گەرمیان لەهۆڵی كۆبونەوەكانی ئیدارەی گەرمیان كۆبونەوەیەك بەڕیوەچوو.
لە كۆبوونەوەكە سەرپەرشتیاری ئیدارەی گەرمیان سوپاسی فەرمانبەرانی سنووری ئیدارەكەی كرد كە سەرەڕای قەیرانی دارایی و سەختی گوزەران و ژیان توانیویانە بەباشی ئیش وكاری فەرمانگەكانیان ڕاپەرینن و ئەوەی بەشەرەفێكی گەورە وەسفكرد.
سەڵاح كوێخا رایگەیاند: كاتی ئەوەهاتووە حكومەت پرۆسەی دەوامی فەرمانبەرانی دامودەزگاكانی لەسنورەكەدا بەشێوەیەكی گونجاو ریكبخاتەوە و بەباشترین شێوە بخریتە خزمەت هاووڵاتیانی خۆشەویستی گەرمیان.
لەو چوارچێوەیەشدا سەرپەرشتیاری ئیدارەی گەرمیان رایگەیاند كە لە ڕۆژی یەك شەممەی داهاتووەوە دەوامی فەرمانبەران ئاسایی دەكرێتەوە.