ئیدارەی گەرمیان ڕایدەگەیەنێت" سكاڵا دژی ھەركەسێك تۆمار دەكرێت لەچاودێریكردنی دۆخی تەندروستی تووشبووانی كۆرۆنادا كەمتەرخەم بێت". 

سەڵاح كوێخا سەرپەرشتیاری ئیدارەی گەرمیان بە ئامادەبوونی بەڕێوەبەری گشتی تەندروستی گەرمیان و قائیمقامی كەلار و بەڕێوەبەری كاروباری مرۆیی و جێگری بەڕێوەبەری گشتی تەندروستی و بەڕێوەبەری نەخۆشخانەی كەلار و بەرپرسی لقی گەرمیانی سەندیكای كارمەندان و لەبەشێكیشیدا ژمارەیەك كارمەندی تەندروستی نەخۆشخانەی قەڵا، بەمەبەستی جێبەجێ كردنی ڕێوشوێنی نوێ‌ بۆ ڕووبەڕووبوونەوەی ڤایرۆسی كۆرۆنا كۆبووەوە و چەند بڕیارێكیاندا.

لە كۆبوونەوەكەدا، سەڵاح كوێخا دووپاتیكردەوە،”كە بەھیچ جۆرێك ڕێگە بە كەمتەرخەمی لە چاودێری تەندروستی تووشبووانی كۆرۆنادا نادرێ و ھەركەمتەرخەمێك لەم كەیسەدا لە ڕێی داواكاری گشتییەوە سكاڵای لە دژ دەجوڵێندرێت”.

سەرپەرشتیاری ئیدارەی گەرمیان جەختیشی كردەوە: ژیان وسەلامەتی خەڵك ھێڵی سوورە و ئیدارەی گەرمیانیش بەردەوام بۆ ئەم مەبەستە ئەوپەڕی پشتیوانی بەڕێوەبەرایەتی گشتی تەندروستی گەرمیانی كردووە و لەم بوارەشدا ڕێگە بە ھیچ ململانێیەكی نەخوازراوی حیزبی وكەسی نادرێ كە خەڵكی ھەژار و لێقەوماوی تێدا ببێتە قوربانی. 

سەرپەرشتیاری ئیدارەی گەرمیان ئەوەشیخستەڕوو: ناكرێ حكومەت لەم بارودۆخە ناھەموارەدا نەتوانێ مووچەی كارمەندانی بدات و داوای دەوام ئیلتیزامیشیان لێ بكات، بۆیە پێویستە دەست بەجێ لە وەزارەتی تەندروستییەوە دەست بە دابەشكردنی مووچە بكرێت.

هەروەها لە كۆبوونەوەكەدا چەند بڕیارێك درا كە ئەمانەی خوارەوەن:

١.دەست بەجێ بەشەناوخۆییەكی زانكۆی گەرمیان وەك نەخۆشخانە لەلایەن بەڕێوەبەرایەتی گشتی تەندروستی گەرمیانەوە بۆ لەخۆگرتنی ئەو تووشبووانەی كۆرۆنا بەكاردەھێنرێت كە ھیچ نیشانەیەكیان نییە.

٢ . بەسوپاسەوە بۆ سەرۆكایەتی زانكۆی گەرمیان ڕۆژانە سوود لە تاقیگەی پشكنینی زانكۆ دەبیندرێت بۆ پشكنینی گومانلێكراوانی تووشبوو بە كۆرۆنا.

٣.تیمی تەندروستی چاودێری نەخۆشەكانی نەخۆشخانەی قەڵا بەدكتۆر و كارمەندەوە لە كاردا دەبن وتەواوی پێداویستیەكانی بۆ دابین دەكرێت.

٤.كێشەی كارپێكردنی ئامێرەكانی ھەناسەدانی دەستكردی نەخۆشخانەی قەڵا بەپەلە چارەسەر دەكرێت.

٥ . بەپەلە كار بۆ كردنەوەی نەخۆشخانەكانی فریاكەوتن لە سنووری ئیدارەی گەرمیان دەكرێت.