وەک هەمیشە قسەمان لەسەر ئاییندە ئەبێت، پێچەوانەی سەرکردەکان و زۆرینەش، کەهەمیشە کەکارتێکراوی ڕووداوەکانن، نەوەک ڕووداوەکان درووست بکەن.
یەک؛
کێ نەخشی پەنجەی لەسەر ئاییندەی دیمەشق جێ ئەهێڵێت، خەڵکی سووریاو حزبە مەدەنییە دیموکراتەکانی؟ یان گرووپە چەکدارە ئیسلامییە سونییەکان کە بۆنی بارووت وخوێن و ئیرهابیان لێ دێت؟
دوو؛
ڕوونە کە سپۆنسەری ئەم ڕووداوە مێژووییە دەوڵەتی تورکیایە، کە نەیهێشت لە هاوکێشەی نوێدا پێگەی لەق بێت، ڕێگەش ئەگرێت لە خواستی هێزە کوردییەکان لەڕۆژهەڵاتی فوڕات بۆ گەیشتن بە مافەکانیان.
سێ؛
لێکەوتەی ئەم داڕمانە خێرایەی دەسەڵاتی بەعسی فەردیی و عائیلی، لەسەر وڵاتانی ناوچەکە لەسێ ئاستە، ئاستی پۆزەتیڤ بۆ تورکیای خاوەن ئەجێندا وەک وڵاتانی عەرەب لە کەنداو، ئاستێکی تریش نێگەتیڤە بۆ یەمەن و لوبنان و عیراق کە پاشکۆی ئێرانن، ئاستی سێهەمیش هێشتا ڕوون نییە، بۆ ئیسرائیل کە بەئاشکرا بانگی گۆڕینی هاوکێشەی هێزو نەخشەی سیاسی کرد لەخۆرهەڵات.
چوار؛
ململانێی زلهێزەکان لەناوچەکەو بەرژەوەندییەکانیان کۆڵەکەکانی ڕژێمەکەی بەشار ئەسەدی لەق کردبوو، کە وایکرد تورک لەڕێگەی هەیئەی تەحریری شامەوە "کەهەر لەسەرەتاوە بە ناوەکەیدا ئەجێنداکەشی دیاربووە"، توانی ئەو بۆشایی هێزە لەهاوکێشەکەدا پڕبکاتەوە بۆ ئاییندەی ناوچەکە، کەنەمانی حزبوڵاو حەماس و لاوازبوونی پێگەی ئێران لەبازنەی جەنگ لەگەڵ ئیسرائیل دروستی کردبوو، ئێستەش ئەبێت چاوەڕوانی تەوافوق و ڕێککەوتنی نوێیان بکەین، کەڕەنگە لەسەر حیسابی مافەکانی گەلی کوردو هەندێک لە پێکهاتەکانی تریش بێت لە سووریا، چونکە تورکیا بەهێزەوە هاتەوە هاوکێشەکە.
پێنج؛
تورک کەباسی ئاشتی کرد ئەوە دڵنیابن جەنگێکی وێرانکەر بەڕێوەیە..
ئەمەش ڕێک وا دەرچوو، باسکردنی رموزەکانی تورک لەبارەی ئاشتی و گفتوگۆو ئازادکردنی ئۆجەلان، ئەم پاشهاتەی لەدواوە بوو.
شەش؛
قاسمی سولەیمانی کە فەرماندەی فەیلەقی قودسی ئێرانیی بوو، لەناوەڕاستی هەشتاکانی سەدەی ڕابردووەوە ئەندازیاری هەناردەکردنی شۆڕشی ئیسلامی ئێران بوو لەسەر فەتوای ئایاتوڵاهی خومەینی، کارێکی ووردو زۆریکرد هەر لەجەنگی هەشتاکان لە بەیروت، تا پرۆسەی ئازادی عیراق و ئەنجامەکانی، بەئامانجی چەسپاندنی بیرۆکەی "هیلالی شیعی" لەخۆرهەڵات، بەهەق ئیمپراتۆرییەتێکی بەهێزی لەسەر ئەرزی واقیع لەئێرانەوە بەناو عیراق و سووریا و لوبنان و فەلەستین چەسپاندبوو ، پەلیشی هاویشت بۆ یەمەن تا بەحرەین لە کەنداو، ئەمڕۆ لەئەنجامی ململانێی زلهێزە جیهانییەکان، ئیمپراتۆرییەتەکەشی شەق و پەق بوو، لێرەش ناوەستێت!
حەوت؛
دوای ئەسەد چی؟
سیناریۆکان زۆرن؛ دەوڵەتی دەستوری و دامەزراوەی دیموکراسی، کە ئەمەیان لە زەلکاوی سووریاو خۆرهەڵاتدا زەحمەتە.
سیستمی فدراڵی و دەستووریی، کە ئەمەشیان لەبەر تورکیا بڤەیە.
دەوڵەتێکی دەستووریی وئایینی سوننی، کەمن بڕوام وایە تورک و هێزە چەکدارەکانی خولگەی تورکیاش ئەوەیان ئەوێت بۆ کۆتاییهێنان بە فۆبیای ئیدارەی کوردی لە سنوورەکانی خۆیان و درێژەدان بەئاڕاستەی حوکمی ئۆردۆغان حزبەکەی، پێشبینیم ئەوەیە حکومەتی ئیسرائیل بەمە قەڵس و نیگەران بێت.
غیابی دەسەڵاتی دەوڵەت، لەسایەی گروپ و میلیشیا و ئەجێندا دەرەکییەکان، تا ئاستی جەنگی ناوخۆیی و بەلوبنانکردنی شام، کە ئەمەیان زۆر پیشبینی ئەکەم، لەسایەی کۆمەڵگەی سووریی فرە ڕەنگ و نەمانی سوپاو کرێگرتەی گروپ وحزبەکان بۆ دەرەوەو ململانێی نفوزو جەنگ لەگەل ئیسرائیلی هاوسنوورو بوونی "ئەمریکا، ڕووس، تورک و حزبوڵاو داعشی کۆن و نوێ" .
هەشت؛
دوای سووریا کوێی تر؟
جەنگی هاوپەیمانان وئێران و ئیسرائیل تەواو نەبووە، ئیسرائیل وەڵامی دوا گورزی ئێران و میحوەری مقاوەمەی عیراقی نەداوەتەوە، هاوکێشەی گۆڕین و هێز لەخۆرهەڵات هێشتا ماوێتی ، بۆیە زۆر بەخێرایی ڕووداوی تر دێتە پێش، چ لەعیراق، یان یەمەن، رەنگە ڕاستەوخۆ لە سەنتەرو سەرچاوەی هەڕەشەکان کە تارانە.
ئەوەی لەدیمەشق ڕویدا، بۆ هەریەکەیان واریدە، عیراق تێوەگلاوە، خۆی یەکلاکردەوە و تەواو.
نۆ؛
ئایا ئایاتوڵاهی خامەنەیی جامە ژەهرەکە ئەنۆشێت؟
من پێم وایە دوێ شەو دیمەشق تارانی ڕاچڵەکاند، ئیتر ڕابەرانی ئێران، پێگەی خۆیان و هاوپەیمانەکانیان، بەسێ ڕەهەندیی بینی، بۆیە پێشبینی خواردنەوەی پیاڵەی ژەهرەکەیان لێ ئەکەم، وە تەسلیم بوون قبوڵ ئەکەن لەم ململانێیە، بۆ ڕزگارکردنی خۆیان و سیستم و وڵاتەکەیان لە کاول بوون..
ئیتر بەرامبەرەکەیان چۆن مامەڵەی لەگەڵ ئەکات، من نایزانم.
دە؛
خۆمان، هەرێمی کوردستان..
سەرکردایەتی کلاسیسیکی کورد، لە خەوێکی قووڵدا بوو، گێژو مەستی بۆنی نەوت ودەسەڵات و پارە بوو، تۆبڵێی ئەمشەوی شام ڕایچڵەکاندبن؟!
با لەخۆیان بپرسین؛ لە 1991 ەو، هەموو شتێک بوون، جەنگی ناوخۆیی و پەنابردنە بەر عیراق و ئێران و تورکیاتان تاقیکردەوە، ئەوەی پەناتان بۆ نەبرد ئەقڵ و زانست و گەلەکەتان و خواستەکانی بوون.
حوکمی فەردیی و خێزانیی و سەربازیی وحکومەتی پۆلیسیشتان تاقیکردەوە، تێگەییشتن پرۆسەی نادیموکراسی و دەسادەس نەکردنی دەسەڵات و نیشتمانیی نەبوون و کوردستانیی نەبوون چییە؟ پێچەوانەکەشی چییە؟! وە بەکوێتان ئەگەیەنێت.
زۆر درەنگە، بەڵام لە سیاسەتیش دا ئەستەم نییە..
دووڕیانێکەو هیچی تر؛
بەردەوام بوون و هەمان چارەنووسی دوێ شەوی شام.
یانیش ملدان بۆ کشانەوەیەکی شەرەفمەندانەو ڕاستکردنەوەی ڕێڕەوی دیموکراسیی ودەسەڵاتی گەل و حکومەتی یاساو دەستوورو دەرچوون لە خولگەی تورکیاو ئێران و مەزهەبییەکان لەعیراق، بەهەر نرخێک بێت..
دوو زۆنی حوکمڕانی، دوو سوپا، دوو ئاساییش، دوو دارایی، دوو دادگە، دوو ناوەندی بڕیاردان، دوو خێزانی حاکم لەهەردوو زۆنەکە، "ئینتیحارە"..
ئەبێت کۆتایی پێ بهێنرێت.