شەڕی لالە زار، وەک یەکێک لە ڕووداوە تراجیدییەکانی شاری سلێمانی و وەک یەکێک لە ڕووداوە نەفرەتلێکراوەکانی مێژووی ئێمە، تۆمار دەکرێت!
ئەوەی ڕووداوی شەڕی لالەزار لە ڕووداوە بچووکەکان جیادەکاتەوە، تۆمارە مێژوویەکانە، بۆ نموونە:
یەکەمجارە چەکی هاوپەیمانانی کورد، بە دەستی کورد دژی کورد، لەم شارەدا بە کار دێت!
یەکەمجارە لە مێژووی ئەم شارەدا، کورد دەبابە و درۆن دژی یەکتر بەکار دێنێت!
یەکەمجارە تاڵەبانییەکان لەناو ماڵباتی خۆیاندا، ببێتە شەڕیان و بە دەبابە و درۆن لە یەک بدەن و لەو شەڕەدا دەیان چەکدار لە یەکتر بکوژن!
یەکەمجاریشە لە گەڕەکی سەرچناری شار سلێمانی، (سەرچناری شیعرەکەی بادی خۆشمروری نالی، کە لە سەردەمی داگیرکاری عوسمانییە تورکەکاندا نووسراوە)، کورد شەڕێکی گەورە و ترسناک دژی خۆی بکات!
ئەوەی لە بیست و دووی ئاب لە سەرچنار و لە لالەزار ڕوویدا، ڕووداوێکی ترسناکی گەورەیە!
دوای ئەو ڕووداوە، ئیدی سلێمانی لە دەرەوەی هەموو پێوەرە یاساییەکانە، لە دەرەوەی و هەڵبژاردنە پەرلەمانییەکان و سیستمی نوێنەرایەتی و خەونی دیموکراتی و پێکەوژیانی ئاشتییانەیە!
ئەوەی ڕوویدا دابڕانێکی گەورەیە، مێژووی پێش بیست و دووی ئاب، لە دوای بیست و دووی ئاب، جیا دەکاتەوە!