پەیامەكەی محەمەد شەیاع سودانی زۆر ڕونە، فەرمون با پارلەمان بڕیاری جەنگ دژی ئەمەریكاو ئیسرائیل بدات و بچێتە شەڕەكەوە، لەمەدا دیارە ئێراق لە چ بارو دۆخێكدایەو بە دەست كێوەیە ، بە پێی بوونی نەجەف و كەربەلا بوایە لە عێراق دەبوو شیعەی ئێران لە ژێر فەرمانی شیعەی ئێراقدا بوایەن ، بەڵام ئەوە ئێستا قومە عێراقیشی لە گەڵ خۆیدا خستوەتە نێو قەیرانێكی مەترسیدارەوە كە پێدەچێت ئەگەر ئەقڵ و ئاوەز نەكەونە گەڕ كێشەی عێراق زۆر گەورە تر بێت لەوەی ئێستا، ئەوەی كە تا ئێستا بە فەڕمی دانی بە ئیسرائیلدا نەناوە لەم ناوچەیە بەتەنێ عێراق و ئێرانن، دەنا هیچ وڵاتێكی عەرەبیش نەماوە بە ئاشكرا یان بە نهێنی ئەو كارەی نەكردبێت، كاتێك لویس ساكۆ لە نیازپاكی و بۆ ئەوەی عێراق و گەلەكەی لە ئاسایشدا بن قسەیەكی لە بارەی ئاشتی و پێكەوە ژیانەوە كرد " هەرچەند دواتر بە جۆرێك پاشگەز كرایەوە" دنیای بەسەردا ڕوخێنرا ، ئێستا سودانی كە ئەو كات ئەویش وەڵامی ساكۆی دایەوە هەمان قسەی ساكۆ دەكات، وەلێ بە شێوازێكی تر، كورد لە مێژوە گوتویانە شەڕی ئەو دۆڵە دێنێتە ئەم كۆڵە، جا ئێستا ئەوەی ناو نراوە بەرەی بەرەنگاری عێراق ڕێك ئەو كارە دەكات ، ئەوەبۆیە سودانی دەڵێت فەرموو لە پارلەمان ئەو كارە بكەن و خۆتان بەرپرسیارەتی ئاكامەكەی هەڵبگرن .
كاتی خۆی حەرەس قەومی لە عێراق بۆ سەركوتكردنی كورد و حزبی شیوعی دروستكرا ، ئەوان یاسای تایبەتیشیان بۆ دەرچوو ، جا لانی كەم لە پەیوەندی نێوان كوردو عەرەبدا ئەوان سەت ساڵ عێراقیان بردە دواوە، حەرەس قەومی كە زۆر كەم لەبارەی ناشرینی و ستەمەكەیانەوە نوسراوەو ئێستا دۆستێك خەریكی كتێبێكی گرنگە لەو بارەیەوە ، پێشتریش بە كوردی و بەعەرەبی ئەو كتێب و نامیلكانەی لە بارەیانەوە نوسراون لە پەنجەی دوو دەست تێناپەڕن ، من بۆخۆم كاتی خۆی لە هەوڵێكا هەندێ كارم لەسەر كرد، پەسیوانیان كردمەوە ، ئەوە چیرۆكی خۆی هەیە، ئێستا دیرۆكی حەرەس قەومی ناشرینترین دیرۆكی نێو لاپەڕەی مێژوی عێراقە ، عێراقێك كە لانی كەم 4500 ساڵە بون و شارستانیەت و خیانەت و كوشت و بڕی تیایەو لە سەر ئاستی دنیا لە یەكەمین ناوچەی شارستانیەتە، سەیر ئەوەیە زۆر كەم لە بارەی حەرەس قەومیەوە ئەوانەی بیرەوەریان نوسیوەتەوە ئاماژەیان بەو گروپە داوە، نازانم ئەوە هۆكاری چیە ، بەڵام ناشرینی حەرەس قەومی ، دەرهەق كورد هی ئەوەیە زۆر كاری لە سەر بكرێت.
حەشدی شەعبی كە بریتیە لە دەیان گروپ و دەستە پارلەمان ڕەوایەتی پێداوەو عەلی سیستانی فتوای بۆ دەركردوەو موچەو چەك و چۆڵیان زۆربەی لە سەر عێراقە، لەناو ئەو گروپ و دەستانەدا خەڵكی زۆر توندئاژۆو دژە ژیان و دژە دیموكراسی هەن ، خەڵكێك لە پەیڕەزانی ئیمامن و مستە خۆڵێكی ژێر پێی ئیمام بە هەمو خاكی عێراق ناگۆڕنەوە، ئێستا بەشی زۆری ئەوان بوونەتە گرفتە گەورەكەی بەردەم عێراق و سودانی و ئایندەی ئەم وڵاتە، ڕاكێشانی عێراق بۆ ناو شەڕێكی مەترسیدارو لە بن هێنانی ئابوری یەكێكە لەو كارانەی ئێستا ئەو گروپگەلەی حەشدی شەعبی دەیانەوێت بیكەن ، یان كردویانە هەڵبەت ڕەنگە بۆ زۆر كەس بەراوردی نێوان حەشدو حەرەس قەومی جێی نیگەرانی و قەبوڵنەكردن بێت وەك ئەوەی گوایە ئەمان شەڕی داعشیان كردوەو عێراقیان رزگار كردوە و حەرەس قەمی بە پێچەوانەوە شەڕی كوردو عەرەبی عێراقی كردوە، كێشەكە ئەوەیە هەنگاو گەلی هەر یەك لەوان عێراقی بەرەو كوێ بردوەو دەبات ، ئێستا ئەم دۆخە عێراقی خستوەتە بەردەم دوو ڕێگاو ڕێگای سێیەمی نیە ، یان ئەوەتا عێراق حەشدی شەعبی بەم جۆرەی ئێستای هەڵوەشێنێتەوەو ڕێكیبخاتەوەو بیخاتە سەر وەزارەتی بەرگری و لە بن فەرمانی وەزارەتا بن ، یان مل بۆ میلیشیای توند ئاژۆی نێو حەشد بدات و عێراق تەڤلی شەڕێك ببێت كە شەڕی ئەو نیە، لێرەدا ڕای ئاوەزداران دەردەكەوێت كە دەتوانن چی بكەن .
ئەو شەڕەی ئێستا هەیە بۆ ئەمەریكا شەڕی ئابوری و زلهێزی و لە مەنگەنە دانی چینە، بۆ ئیسرایل شەڕی فراوانخوازی و دانپیانانە، بۆ ئێران شەڕی مانەوەو بەردەوامی و ملنەدانە، لێرەدا پرسیار ئەوەیە بۆ عێراق و بۆ گروپگەلی نێو حەشد شەڕەكە شەڕی چیە، ئەمە پرسیارە سەرەكیەكەیە.