لە هەموو تەمەنمدا، چەندین خەڵكی جیاوازم بینیووە لە میللەتانی دونیا، كەسم نەدی لە سەر شوناس و نیشتمانی خۆی سازش بكات وەكو كورد. هەموو میللەتانی دونیا هێلی سوری نەتەوەییان هەیە، كە بە قەدەر سەری دەرزیەك سازشی لە سەر ناكەن. زۆر بە داخم بڵێم كورد دەیكات! لە بەر ئەمە و لە لەبەر خەم و كۆستی تری زۆریش، پەیوەست بە كورد و پرسەكانی، كوردبوون لە دونیا خەم و برینێكی قوڕسە بۆ كەسێك خۆی تاڵیبی مانا بكات. بەڵام بۆ كەسێك هەموو خەمی پارە و نان و خۆشگوزەرانی بێت، خەمەكانی لە خەمی هیچ گیانەوەرێكی تر زیاتر نیە!
ئەمڕۆ ١٣ی تەمموزە، ساڵیادی تیرۆركردنی دكتۆر قاسملۆ و هەڤاڵانیەتی لە ڤییەنای پایتەختی نەمسا. لە گەڵ ئەوەی ٣٧ ساڵە ئەم تاوانە، لە ناو جەرگەی ئەوروپا، دژ بە میللەتی كورد كراوە، كەچی تا ئێستا كورد نەیتوانیووە ئەم ڕووداوە بۆ گەڕدانی كێشەی ڕەوای خۆی بقۆزێتەوە، وێڕای ئەوەی بەدواداچوون بكات و داوای دادوەریی و مافی خۆی پێ بكات. هەر ئەم گوێمەدێ و كەمتەرخەمی كوردە وایكرد، ڕژێمی ئێران، دوای سێ ساڵ دەستدرێژیییەكی تری هاوشێوە بكاتە سەر كورد و لە ناو جەرگەی ئەوروپا، ئەمجارە لە بەرلین، دكتۆر سادق شەڕەفكەندی و هەڤاڵانی تیرۆر بكات و ئەوانیش بە دەمانچەی تیرۆر و نامەردیی هەناسە سارد بكاتەوە. لە تەك دكتۆر قاسملۆ و دكتۆر شەڕەفكەندی، دكتۆر فازڵ ڕەسولیش ئەو سێ كەسایەتیە بەرزەن كە لە دەست كورد ستێنران و زەڕبەیەكی كوشندەیان پێ لە ڕۆحی كورد درا. چونكە هەر سێ لەم كەسایەتیانە، ناودار و خاوەن پێگەی زانستیی و ڕۆڵی گەورە بوون. هەر لە هەمان ئەم ساڵانەدا، ڕژێمی ئێران چەندین زانا و كەسایەتیی ناوداری كوردی لە ناو جەرگەی كوردستان تیرۆر كرد.
هەڵسوكەوتی سوكی كورد، دەرهەق بەم تاوانانە، پێگەی كوردی لە لایەن وڵاتانی جیهان كەم-بایەخ كردووە و كوردی وا هێناوەتە بەرچاوی دونیا، وەك خەڵكانێكی بێ پلان و بێ نەخشە و بێ هەڵوەدای سەروەریی و ئازادیی (ڕێك وەكو قەرەج). جگە لە مەش، هەڵسوكەوتی سوكی دەستەڵاتی هەرێم و حزبەكان و چاوشۆڕیان بەرامبەر بە ڕژێمی ئێران، وایكردووە، ئەم تاوانانە لە نێو كورد بێ بەها و نرخ بمێننەوە، گەنجی خوێن گەرمی كورد سارد ببێتەوە و بە سەر خۆیدا بشكێتەوە كە كوردە!
لە جیاتی پێداگری حزبە بە ناو كوردستانییەكان لە سەر مەزڵومیەتی كورد بە دەستی ڕژێمەكانی ناوچەكە، لە نێویشیان ڕژێمی ئێران، پۆل پۆل سڕە دەگرن لەوەی كامیان پێشتر بچێتە بەر دەرگای ئاغای ئێرانی بۆ وتار خوێندنەوە لە پرسەی سەركردە گۆڕ بە گۆڕەكانیان. هەمان هەڵسوكەوتی سوك و چروك بەرامبەر بە دەوڵەتانی تری ناوچەكان بەدی دەكرێت. بەڵام كاتێك پێشنیار دەكەی بۆ بەرز-ڕاگرتنی یادی تیرۆركردنی سەركردە و كەسایەتیی كورد، كەس لەم بە ناو حزب و بەرپرسە "كوردانە" خۆیان ناكەن بە ساحێب. بۆ نمونە، ساڵی ٢٠٠٦، بیست ساڵ لەمەوبەر، هەوڵمدا سەنتەرێكی لێكۆڵینەوە بە ناوی فازڵ ڕەسول لە كوردستان دابمەزرێنین، پرۆژەم خستە بەردەم زۆرینەی ئەم حزبانەی هەرێم، كە ئێستا لە بەر دەرگای تازیمانەی خامەنەئی كەوتوون، بۆ پێشەكەشكردنی تازیمانە و نۆكەریەتیی خۆیان بۆ ئاغای هەمیشە زاڵ بە سەریان، كەچی هەر هەموویان ئەم پێشنیارەیان پشتگوێ خست و بەلایانەوە گرنگ نەبوو.
ئەم هەڵسوكەوتە سوكەی پارت و حزب و دەستەڵاتی كورد، وای لە ئەمریكا و ئەوروپا كردووە، بە چاوی نزم و گوێ پێنەدان تەماشای كورد بكات. ئەمڕۆ، ئەمریكا تەواو كوردی پشتگوێ خستووە و زۆر بێ نرخانە مامەڵەی كورد دەكات، ئەوروپاش هەر لەولاوە. بەشێكی ئەم حاڵەتە بۆ خودی كورد دەگەڕێتەوە كە سوك و چروكانە لە گەڵ دوژمنانی خۆی هەڵسوكەوت دەكات، ئەمریكا و ئەوروپاش ئاگایان لەم حاڵەی كورد هەیە. بەشێكی تریش بۆ ئەوە دەگەڕێتەوە، پارت و گروپەكانی كوردستان بەردەوام ڕاپۆرت لە سەر یەكتری دەدەنە وڵاتانی ڕۆژئاوا، وێڕای ڕاپۆرتی خەڵكانی كوردی زوڵملێكراو بە دەستی دەستەڵاتی هەرێمی كوردستان. بەسەر ئەمەشەوە، كەمینەكانی وەكو نەستۆڕیەكان (كە ناوی خۆیان ناوە ئاشوریی) بەردەوام ڕاپۆرتی زۆر خراپ دەدەنە وڵاتانی ئوستڕاڵیا، نیوزیلەند، ئەوڕوپا و ئەمریكا دژ بە پارت و حزب و دەستەڵات و نەتەوەی كورد بە گشتیی، زۆر بە تایبەتیش لە سەر پارتی دیموكراتی كوردستان و بنەماڵەی بارزانی.
ئەوەی بەڵگەش دەداتە ئەم وڵاتانە، خودی كوردە، بە هۆی كەمتەرخەمی بێ وێنەی لە ئاست بوونی خۆی وەك نەتەوە، وەك ترسنۆك و كۆیلە بەرامبەر بە دوژمنانی خۆی، وەك تەنێكی گەڕۆكیش بە دوای تێركردنی حەزە هەنوكەییەكانی لە پارە و خۆشگوزەرانی دونیا لە سەر حیسابی خەم و كۆست و پرسە گرنگەكانی ژیان وەك نەتەوە، سیاسەت، دەوڵەت، سەروەریی داهاتووی ڕۆڵە و نەتەوەكانی.