ئێمەی كورد هەر لەدێرزەمانەوە كێشەیەكی گەورەمان لەگەڵ ئەو سامانە سروشتییەی كوردستانەكەماندا هەبووە كە لەجیهاندا بەزێڕی رەش ناسراوە، چونكە زۆربەمان هۆی لەتلەتكردن‌و ئێش‌و ئازارو مەینەتیی خاك‌و گەلەكەمان دەگەڕێنینەوە بۆ ئەو زێرە رەشەی كە زۆرجار ئارەزووی ئەوەمان كردوە كە كاشكێ هەر نەمانبووایە. 

ئەوە ماوەیەكە باس باسی نەوتی هەرێمەو ئەمانەش سەردێڕی هەواڵەكانی ئەم ماوەیەی ئەو سامانە سروشتییەی هەرێمەكەمانە. «هەرێم دەتوانێت رۆژانە دووسەدو پەنجا هەزار بەرمیل نەوت هەناردە بكات»، « نەوتی هەرێم دەتوانێت پێداویستیی دووسەدو پەنجا ساڵی توركیا دابین بكات»، « پارەی هەناردەكردنی نەوت  پێداویستییەكانی هەرێم دابین ناكات»، « شاندی هەرێم چووە بەغداو كۆمۆی كرد بەسۆمۆ»، «وتەبێژی هەرێم وتی: نەخێر ئێمە رەزامەندیمان دەرنەبڕیوەو نەسۆمۆ دەكینە كۆمۆو نەكۆمۆش دەكەینە سۆمۆ»، «هەناردەكردنی نەوت بەپێی دەستووری عیراقە»، «هەرێمی كوردستان هەرێمێكی نیمچە سەربەخۆیەو خۆی بڕیار لەسەر هەناردەكردنی نەوتی خۆی دەدات بەبێ گەڕانەوە بۆ بەغدا»، «ئەمریكا پشتگیریی هەرێم دەكات كە نەوت بنێرێتە دەرەوەی هەرێم»، «ئەمریكا پشتگیریی فرۆشتنی نەوتی هەرێم ناكات بەبێ رەزامەندیی بەغدا»، ئەمانەش لەكاتێكدایە كە پەرلەمان دەڵێت بەزاتی خوا ئاگام لەهیچ شتێكی ئەو نەوتە نییە، وەزیری دارایی دەڵێت: وەڵڵا‌و بیلا پارەی نەوت نایەتە لای من‌و حكومەت دەڵێت: ئەوە پەیوەندیی بەئاسایشی نەتەوەییەوە هەیەو ناتوانین هەموو وردەكارییەكان بدركێنین (لەكاتێكدا كە دەرودراوسێكانمان كڕیارو فرۆشیارن)و بەغدا دەڵێت فلسێكی بودجەی هەرێمتان نادەمێ تا پارەی نەوتەكەم نەدەنەوەو هەرێم لەناكاو لێدوانێك دەدات‌و دەڵێت: پارەی چی‌و نەوتی چی؟ ئێمە هێشتا دەستمان نەكردووە بەهەناردەكردنی نەوت‌و توركیا لەولاوە سوپاسی هەرێم دەكات بۆ نەوتەكەی‌و حكومەت‌و پەرلەمان‌و حزبی دەسەڵاتدارو بێدەسەڵاتیش هەر هەموو كۆك‌و سوورو پێداگرن لەسەر شەفافیەتی نەوت. كەسیش هەر هیچ نازانێت‌و هەمووان تەنیا دەبیستین كە لە 18 كێڵگەوە نەوت دەردەهێنرێت‌و هەمووان دەبینین كە بەسەدان هەزار دۆلار سەرف دەكرێت بۆ بەستنی كۆنفرانسی نەوتی هەرێم‌و لەم گێژاوو حەیسەو بەیسەیەشدا لەناكاو وتەبێژێك هاواری لێ هەڵدەستێ‌و دەڵێت هەی هاوار فریاكەون بانكەكان پارەیان تێدا نەماوەو لەكاتێكدا كە وەبەرهێنەری داماو كە هەتا قوڕقوڕاگەی قەرزارە، دەچێت قەرز دەدات بەبانك‌و لەولاوە دێتە سەر تەلەفزیۆن‌و دەڵێت دەستم بەدامێنت حكومەت هەندێك پارەمان بدەرێ با پڕۆژەكانمان تەواو بكەین! جا سەیرەكە لەوەدایە كە لەكاتێكدا كەس فلسی لەگیرفاندا نییەو هەندێك سێ مانگە نەیانتوانیووە كیلۆیك گۆشت بكڕێت، كەچی موزایەدەی سیاسیشمان بەسەرا دەكرێت.. ئەرێ تۆ ئیمانتان ئەوە گاڵتەجاڕی نییە؟

بڕواناكەم هیچ كوردێك دژی ئەوە بێت كە كورد خاوەنی نەوتی خاكەكەی خۆی بێت، بەڵام لەو بروایەشدا نیم كە كەس لەگەڵ ئەوەدا بێت كە بەم شێوەیەی ئێستا مامەڵە لەگەڵ سەروەت‌و سامانی گشتیدا بكرێت، دەبوو سندوقێك یان كۆمپانیایەكی نەوتی خۆماڵی‌و نەتەوەیی كورد دابمەزرێنرایە تاوەكو هەموو تاكێكی كورد ئاگاداری زێرە رەشەكەو پشك‌و پارەكەی بوایە. نەك وەك ئێستا كە هەر تەنیا چەند پشكدارێكی نادیار خاوەنی بڕیاربن‌و ئەو مافە بەخۆیان بدەن كە تەنانەت یاریی بەچارەنووسی گەلەكەشمانەوە بكەن! 

دەوترێ كە چەند كۆمپانیایەكی بەحساب كوردی هەن كە لەو بوارەدا كاردەكەن، بەڵام ئەوانە كاریان تەنیا خزمەتكردنی كۆمپانیا زەبەلاحە بیانییەكانە بۆ دابینكردنی پێداویستییەكانیان، هەر لەجل شتنیانەوە تا ساندویچ دروستكردن بۆیان. ئەرێ لەكام وڵاتانی دیكەی خاوەن نەوتی ئەم جیهانەدا كاتێك كە كێڵگەیەكی نەوتی دراوەتە كۆمپانیایەكی بیانی بەبێ بەرامبەر خاكەكەشی پێ دراوە؟ ئەرێ كێ تەنزیلات‌و نرخ داشكاندن بۆ نەوت دەكات؟ نەوت نرخی بازاری جیهانی هەیە، باشە بۆ خاك‌و نەوتەكەشمان ئەوەندە بێ نرخ‌و بێ بەهایە لای هەندێك؟ دوای ئەوە چ پێویست دەكات نەوتی هەرێم بفرۆشن لەكاتێكدا كە سەرچاوەی بودجەی هەرێم لەفرۆشتنی نەوتەكەیەوە نییە؟ بۆ ئەو زێڕە وەك ئەمریكاو وڵاتە زلهێزەكانی دیكە هەڵناگرن بۆ ئایندەو پاشەڕۆژو پاشان كوردستان كە گازی هەیە، بۆ سوود لەو گازە وەرناگرن‌و بۆ نەوتەكەی بەفیرۆدەدەن؟ لێرەدا كۆمەڵیك پرسیار دێتە پێشەوە كە ئایا ئەو كێڵگە نەوتییانە شەخسین؟ ئایا تاپۆكراون؟ ئەگەر وایە، كەواتە بۆ لەسەر حسابی هەرێم وەزارەتی بۆ دانراوەو بۆ ناوی ئەو وەزارەتە ناكرێتە دەزگای سامانە شەخسییەكان لەجیاتیی وەزارەتی سامانە سروشتییەكان، چونكە سامانی سروشتی بەنەوت‌و ئاو و خاك‌و كانزاكانەوە موڵكی گشتین‌و دەبێت بەو شێوەیەش مامەڵەیان لەگەڵدا بكرێت‌و زێری رەش لەو جۆرە زێرانە نییە كە بكرێتە ملوانكە بۆ تاكە گەردنێك. 

تێبینی ئەم وتارە لە کوردستانی نوێ کراوەتەوە