هەموو ئەو سیفەتانە هاوتای سیفەتی هۆمۆ ساکەرن. بۆ نموونە، لە تورکیا کەسی تۆمەتبارکراو بە تیرۆر لەهەمان کاتدا کەسی داماڵدراوە لە بەهاو پارێزبەندی هاوڵاتی و مرۆڤبوون و هاوتای هۆمۆ-ساکەر کوشتنی نەک هەر ئاساییە و هیچ کێشەیەکی یاسایی بەدوای خۆیدا ناهێنێت، بەڵکو ئەرک و فەرمانی سەرەکی خودی دەوڵەتیشە. پەناهەندەکانی مەخموور بەشێکن لە پرۆسەی بە هۆمۆ-ساکەر کردنی کورد و تەنانەت ئاوارەی و پەنابەری و ژیانی کەمپیش ئەوانەی لە یاسای هۆمۆ-ساکەر بوون نەپاراستووە و ناپارێزێت. هاوشێوەی هۆمۆ-ساکەرەکانی سەردەمی رۆمان، کوردە سەربەرز و دەستەمۆ نەکراوەکانی باکور، لەوانەش پەناهەندەی کەمپی مەخموور، لەلایەن دەوڵەتی تورکەوە بەر نەفرەت دەکەون دەکرێنە هۆمۆ-ساکەر. هۆمۆ-ساکەرێک کە لە هاوڵاتی بوون مەحروم دەکرێن لە مرۆڤبوونیش دادەشۆرێندرێن بەڵام بە جیاوازییەکی گەورە. هۆمۆ-ساکەری رۆمانی لەدەرەوەی سنووری سەروەری رۆمانیدا مافی مرۆڤبوونی بەدەست دێنایەوە، بەڵام کوردی باکور کە دەخرێتە خانەی هۆمۆ-ساکەرەوە، هەروەک لە کەمپی مەخموور دەیبینین، لەدەرەوەی سەروەری دەوڵەتی تورکیش ئەم ماف و خەسڵەتە مرۆڤبوونە بەدەست ناهێننەوە. بۆیە، لەکەمپیشدا وەک هۆمۆ-ساکەرێک، بوون و نەبوونیان هیچ بایەخێکی نابێت و کوشتنییان هیچ لێپێچینەوەیەکی نە لە تورکیا، نە لە باشور، نە لە عێڕاق و نە لەسەر ئاستی نێودەوڵەتیدا بەدوادا نایەت. هەموو جۆرە بوونێکی هۆمۆ-ساکەری خراپ و قێزەون و نامرۆڤانەیە، بەڵام بۆردومانکردنی بەردەوامی کەمپی پەنابەران، کەمپی مەخموور بە نموونە، پەنابەرانی مەخموور دەخاتە ئاستی خراپترین و قێزەونترین و نامرۆڤانەترین جۆری هۆمۆ-ساکەر. لە یاسا نێودەوڵەتییەکاندا، مرۆڤی پەنابەر، بەتایبەتیش پەنابەری ناو کەمپەکان پارێزبەندی پەنابەری و ئاوارەییان هەیە.

هەم کۆمەڵگای نێودەوڵەتی، هەم دەوڵەتی خانەخوێ بەهەموو شێوەیەک پارێگاری ئەو پەنابەرانە لەخۆ دەگرن. لەهەمان کاتیشدا، ئەو دەوڵەتەی کە پەنابەرەکانی لێوە هاتووە، بەهەموو جۆرێک خۆی لە کوشتنی ئەو پەنابەرانە دەپارێزێت. بەڵام پەنابەرانی مەخموور سنووری هەموو ئەو ئەزموونانەی تێپەڕاندووە کە هۆمۆ-ساکەرەکان بەدرێژایی مێژوو ئەزموونیان کردووە و بەردەوام کراونەتە ئامانجی هێرشی فرۆکەی ئێف ١٦ و درۆن (رۆبۆتی مرۆڤکوژ)، بێ ئەوەی یاسایەکی ئاسمانی یان زەمینی بیانپارێزێت. لەم سەدەی بیست و یەکەدا، ئەگەر یەک نموونەی هۆمۆ-ساکەر هەبێت، ئەو نموونەیە بێ دوودڵی پەنابەرە ئاوارەکانی مەخموورن. ئەوان هۆمۆ ساکەرن، ئەوان لەدەرەوەی هەموو یاسا و رێسا ئاسمانی و زەمینییەکانی ئەم سەردەمە دا و سەرەنجامیش لەدەرەوەی بازنەی مرۆڤبووندا دەژین. ژێردەستەیی کورد شەرمەزارییە بۆ بەشەرییەت.