وەزارەتی پێشمەرگە رایدەگەیەنێت" لەئەنجامی ئۆپەراسیۆنی هاوبەشی نێوان هێزی پێشمەرگە و سوپای عێراق بە پاڵپشتی هاوپەیمان، چەندین بنكەی داعش خاپور كران و سێ ئۆتۆمبێل سوتێنراون".
سەنتەری میدیای وەزارەتی پێشمەرگەی حکومەتی هەرێمی کوردستان لە ڕاگەیەندراوێکدا رایگەیاند" ڕۆژی ٦ی حوزەیران ئۆپەراسیۆنێكی هاوبەش لەنێوان هێزەكانی پێشمەرگە و هێزێكی سوپای عێراقی، بە پاڵپشتی هێزەكانی هاوپەیمانان ئەنجامدرا، لە گوندەكانی پەلكانە و قۆریچایی لە سنووری نێوان قەزای كفری و خورماتوو".
ئاماژەی بەوەشکردوو، لە ئۆپەراسیۆنەکەدا سێ ئۆتۆمبێل سووتێنران و چەندین بنكەی تیرۆریستان خاپوور كران.
وەزارەتەکە باسی لەوەشکردووە، ئامانج لەو ئۆپەراسیۆنە دوورخستنەوە و لەناوبردنی تیرۆریستانە لەو ناوچانە.