وتەبێژی بزوتنەوەی تاڵیبان رایدەگەیەنێت" هیچ لایەنێک بە دوژمنی خۆمان نازانین و وەکو دوژمن هەڵسوکەوت لەگەڵ هیچ کەس و لایەنێک ناکەین".
ئێوارەی ئەمڕۆ سێشەممە زەبیحوڵڵا موجاهید، وتەبێژی بزوتنەوەی تاڵیبان لە کۆنگرەیەکی رۆژنامەوانیدا رایگەیاند" ئیمارەتی ئیسلامی لە پاش سەربەخۆیی بەدوای تەسفیە حسابەوە نییە لەگەڵ كەس، هیچ جەنگێكمان ناوێ لە ئەفغانستان و لەبەر رۆشنایی رێنمایی سەركردەی تالیبانیش لێبوردنی گشتیمان دەركردووە بۆ سەرجەم خەڵك تەنانەت بۆ ئەوانەی لەگەڵ هێزەكانی ئەمەریكاش كاریان كردووە".
ئاماژەی بەوەشکرد، تۆڵە لە هیچ کەس و لایەنێک ناکەینەوە، لەمڕۆوە هیچ لایەنێک بە دوژمنی خۆمان نازانین و وەکو دوژمن هەڵسوکەوت لەگەڵ هیچ کەس و لایەنێک ناکەین.
لەبارەی ڕۆڵی میدیاوە وتەبێژەکەی بزوتنەوەی تاڵیبان داوای لە دەزگاكانی ڕاگەیاندن کرد کە لە كاری خۆیان بەردەوام بن و ڕێز لە ئیسلام بگرن كە بەهای گەلی ئەفغانە و ئێمەش گوێ لە ڕەخنەی ئەوان دەگرین.
لەبارەی مافەکانی ژنانەوە باسی لەوەکرد، ژیانی ژنان و ئازادییەکانیان لە ئەفغانستان پارێزراو دەبێت، بەڵام لە چوارچێوەی بنەما ئیسلامیەکاندا، دڵنیایی دەدەینە جیهان کە ئێمە نامانەوێت زیان بە هیچ کەسێک بگەیەنین.