مەکتەبی سیاسی حزبی سۆسیالیست دیموکراتی کوردستان راگەیەندراوێکی بەبۆنەی کۆتایی هاتنی هەڵبژاردنەکانەوە بڵاوکردەوە و دەڵێت" هەموو هەوڵەکانمان دەخەینەگەڕ بۆ خۆ رێکخستنەوە و خۆسازدان بۆ هەڵبژاردنی داهاتووی پەرلەمانی کوردستان و لە هەر هەنگاو و هەڵوێستێکیش مەبەست و ئامانجمان سەرکەوتن و بەدەستهێنانی ماف و پاراستنی بەرژەوەندییە باڵاکانی گەلی کوردستانە".
ده‌قی راگەیەندراوی مەکتەبی سیاسی حزبی سۆسیالیست:
بەبۆنەی کۆتاییهاتنی هەڵبژاردنەکانی ئەنجومەنی نوێنەرانی عێراق.
هەڵبژاردنی پێشوەختی ئەنجومەنی نوێنەرانی عێراق هەنگاوێکی تری دیموکراسی بوو بەسەرکەوتوویی گەیشتە ئەنجام.
سەرەڕای گۆڕان لە سیستەمی هەڵبژاردنەکان و کێشە تەکنییکییەکان کە ئەزموونێکی نوێبوون بۆ هەمووان بەڵام بە ئارامی و ئازادی بەڕێوەچوونی هەڵمەتەکانی بانگەشە و دەنگدان لە هەرێمی کوردستان و ئەنجامەکانی کورد لە کەرکوک و موسڵ و ناوچە کوردستانییەکانی تری دەرەوەی ئیدارەی هەرێمی کوردستان دەستکەوتی گەورەن و مایەی شانازین بۆ هەمووان.
لەگەڵ پیرۆزباییمان لە نوێنەرە لە سەرکەوتووەکانی هەڵبژاردن، هیوادارین ئەم سەرکەوتنە هۆکاری بەهێزکردنی ڕیزەکانی گەل و هێزو لایەنە سیاسییەکانی کوردستان بێت بۆ بەیەک دەنگ و لەیەک سەنگەر بەرگریکردن لە قەوارەی هەرێمی کوردستان و ماف و داوا ڕەواکانی کورد لە پەرلەمان و حکومەتی ئاییندەی عێراقدا.
لێرەوە سوپاسی سەرجەم ئەندامان و لایەنگرانی حزبی سۆسیالیست دیموکراتی کوردستان دەکەین کە بەپەرۆشەوە بەشداری دەنگدانیان کرد کە ئامانجمان لە پشتیوانی بەربژێرەکان سەرخستنی کەسانی تێکۆشەر و دڵسۆز بوو بۆ بەرپرسیارێتی نوێنەراتی خەڵکی کوردستان لە ئەنجومەنی نوێنەرانی عێراق و هەموو هەوڵەکانمان دەخەینەگەڕ بۆ خۆ ڕێکخستنەوە و خۆسازدان بۆ هەڵبژاردنی داهاتووی پەرلەمانی کوردستان.
لە هەر هەنگاو و هەڵوێستێکیش مەبەست و ئامانجمان سەرکەوتن و بەدەستهێنانی ماف و پاراستنی بەرژەوەندییە باڵاکانی گەلی کوردستانە.
مەکتەبی سیاسی
حزبی سۆسیالیست دیموکراتی کوردستان