ژماره‌یه‌ك له‌ رێكخراوه‌كانی بواری جینۆسایدی گه‌لی كوردستان، ناره‌زایه‌تی له‌ به‌رامبه‌ر  یادكردنه‌وه‌ی ١٠٠ ساڵه‌ی دامه‌زراندنی عێراق ده‌رده‌بڕن.

ئەمڕۆ شەممە ١١ی کانوونی یەکەم، له‌راگه‌یه‌ندراوێكدا ژماره‌یه‌ك له‌رێكخراوه‌كانی بواری جینۆساید و ئه‌نفال بڵاویانکردەوە، له‌كاتێكدا عێراق یادی (١٠٠) ساڵه‌ی ده‌كاته‌وه‌، هێشتا نه‌یتوانیوه‌ برینه‌كانی سه‌ر جه‌سته‌ی گه‌لی كوردستان به‌ تایبه‌تی و كه‌مینه‌كانی تر سارێژبكاته‌وه‌ و له‌به‌رامبه‌ر ئه‌و تاوانانه‌ی به‌رانبه‌رییان ئه‌نجامیداوه‌.

هەروەها لە ماوەی ١٠٠ ساڵەی تەمەنی ئەم دەوڵەتە، گەلی کوردستان بەردەوام رووبەرووی کۆمەڵکوژی و لە ناوبردن و سڕینەوە و راگواستن بۆتەوە.

پێویستە  داوای لێبوردنی فه‌رمی بكات، جیاواز له‌وه‌ش تائێستا ده‌وڵه‌تی عێراق پابه‌ند نه‌بوه‌ به‌ بڕیاره‌كانی دادگای باڵای تاوانه‌كانه‌وه‌.

ده‌قی راگه‌یه‌ندراوه‌كه بەمشێوەیە هاتووە‌:

له یادی (100) ساڵەی دەوڵەتی عێراقدا، تەنها یادەوەری جینۆسایدمان لە گەڵیدا هەیە.

دامەزراوە فەرمیەکانی دەوڵەتی عێراق، لەسەر ئاستە جیاوازەکان، بە چالاکی جۆراوجۆری سیاسی و ڕۆشنبیری و کۆمەڵایەتی وسەربازی و ... هتد، یادی (100) ساڵەی دامەزراندنی دەوڵەتی عێراق دەکەن وەک یوبیلی زێڕین.

لە ماوەی 100 ساڵەی تەمەنی ئەم دەوڵەتە، گەلی کوردستان بەردەوام رووبەرووی کۆمەڵکوژی و لە ناوبردن و سڕینەوە و راگواستن بۆتەوە. دەوڵەتێك لە ماوەی (100) تەمەنیدا هەموو جۆرە پێشلکارییەکی مافی مرۆڤ و تاوانی زەقی  نێودەوڵەتی لە بەرانبەر گەلی کوردستان و كەمیاتییە ئاینی و نەتەوەیی و مەزهەبییەكان پەیڕەو و پیادە کردووە.. و بە ئێستاشەوە هەمان ئاراستە لە بەرانبەر گەلی کوردستان  و مەزهەبی جیا بوونی هەیە و بەردەوامە و بنبڕ نەکراوە.

دەوڵەتی عێراق، لەکاتێکدا یادی (100) ساڵەی دەکاتەوە، هێشتا نەیتوانیووە برینەکانی سەر جەستەی گەلی کوردستان بە تایبەتی و کەمینەکانی تر سارێژبکاتەوە و لە بەرانبەر ئەو تاوانانەی بەرانبەرییان ئەنجامیداوە، داوای لێبوردنی فەرمی بکات.

جیاواز لەوەش.. تائێستا دەوڵەتی عێراق پابەند نەبووە بە بڕیارەکانی دادگای باڵای تاوانەکانی عێراق، بۆ قەرەبوکردنەوەی مادی و مەعنەوی  کەسوکاری قوربانیانی شاڵاوەکانی ئەنفال و کیمیاباران و تەواوی دۆسیەکانی تر، کە لە دادگای ئاماژە بۆکراوە، حوکمی کۆتاییان وەرگرتووە, لە هەمووشی گرنگتر  ئامادە نییە ببێتە ئەندامی دادگای تاوانی نێو دەوڵەتی وەك دڵنەواییە بۆ دووبارە نەبوونەوەی جینۆساید  و تاوانی جەنگ و تاوانی دژ بە مرۆڤایەتی لە ئایندەدا لەم ولاتەدا.

بۆیە وەك بەشێك لە  رێکخراوەکانی بواری جینۆسایدی گەلی کوردستان  و خەمخۆرانی ئەم بوارە، نارەزایەتی لە بەرامبەر  ئەم یادكردنەوەیە دەردەبڕین تا ئەو كاتەی  قەرەبووی مادی و مەعنەوەی قوربانیان دەكرێتەوە و عێراق پەیوەست دەبێت بە دادگای تاوانی نێودەوڵەتییەوە و دڵنەوایی  تەواو بە هەمووان  دەدرێت عێراقی داهاتوو  جیا دەبێت لە عێراقی رابردوو.

ناوەكان:

1- رێكخراوی كوردستان  بێ جینۆساید

2- رێكخراوی چیرۆكەكانی  ئەنفال

3-  تۆڕی رێكخراوە كوردستانییەكان بۆ دادگای تاوانی نێو دەوڵەتی

4- رێکخراوی گەشەپێدانی مافی مرۆڤ

5- گۆڤاری تۆپزاوا

6-  رۆژنامەی نوگرە سەلمان

7- هەڵمەتی ژیان دژ بە ئیعدام لە كوردستان

8- رێكخراوی هەڵمەتی دادپەروەری