فەرماندەی بڕیارگەی ناوەندی پاراستنی گەل-نەپەگە شەوی ڕابردوو لە ڕاگەیەندراوێکدا، ئاماری ساڵی (٢٠٢١)ی شەڕوپێكدادانەكانی لە دژی هێرشەكانی سوپای تورکیا بڵاوکردەوە و ئاشکرای کرد، گەریلا توانی لە ساڵی (٢٠٢١)دا ئاستی گەریلای سەردەم بگەیەنێتە ئاستێکی بەرچاو، بە تایبەت ڕێبازی شەڕی گروپی و گەریلای پڕۆفیشناڵ، تاکتیکی شەڕی پشتبەست بە سەنگەر و تونێل، سوپای تورکی لە گردەکانی سەر سنوورەوە ڕاگرت، هەر لە ڕۆژەکانی سەرەتاوە هەموو پلانەکانی هەڵوەشاندەوە، هەرچەندە سوپای تورکیا پیلانی دانابوو لە چەند هەفتەیەکدا ئامانجەکانی بپێکێت، بەڵام چەندین مانگیش تێپەڕبوو و نەیتوانی هیچ ئەنجامێک بەدەستبهێنێت.

ئەوەشی خستەڕوو، سوپای تورکیا بەهۆی شکستی بەرامبەر بەرخۆدانی گەورەی گەریلا، دەستی برد بۆ بەکارهێنانی چەکی کیمیایی، کە چەکێکی قەدەغەکراوی جیهانییە و بەگوێرەی یاسا نێودەوڵەتییەکانیش تاوانێکی ئاشکرایە، بەوهۆیەوە (٤٠) گەریلا لە سیان، زەندوورا، مام ڕەشۆ، گردی سوور و وەرخەلێ بەرخۆدانێکی قارەمانانەیان بەرامبەر هێرشی توركیا کرد، بەهۆی چەکی کیمیاییەوە شەهیدبوون.