گۆڕان دەستەیەکی ٧ کەسی هەڵدەبژێرێت و لەگەڵ لیژنەی باڵای کۆنفڕانس خۆیان بۆ بەستنی کۆنفرانسی حێزبەکەیان ئامادە دەکەن.
دەقی راگەیەنراوەکە:
لە کۆبونەوەی ئەمڕۆی جڤاتی نیشتیماندا دەستەیەکی حەوت کەسی بە نوێنەرایەتی جڤاتەکانی نیشتیمانی و گشتی و سێ لە هەڵسوڕاوانی دیاری دەرەوەی جڤاتەکان هەڵبژێردران کە بریتین لە (هۆشیار عومەر، نزار مەحمود، هاوڕێ کاوە، دڵشاد ڕەشید، گەیلان شێخ عومەر، د. تەها حەمە عەزیز و شوان قلیاسانی).
ئەو دەستەیەی کە لە کۆبونەوەی ئەمڕۆدا متمانەی جڤاتی نیشتیمانیی وەرگرت لەگەڵ لیژنەی باڵای کۆنفڕانس، دەست بە ئامادەکاری دەکەن بۆ ئەوەی لە نزیکترین کاتدا کۆنفرانسی دوەمی نیشتیمانی بۆ بەخۆداچونەوە و خۆ رێکخستنەوەی بزوتنەوەکە ببەستن.
بەپێی دەستوری رێکخراوەیی بزوتنەوەی گۆڕان
ئەرکەکانی کۆنفڕانسی نیشتیمانی خۆی دەبینێتەوە لە؛
- نوێکردنەوەی بەرنامەی سیاسی لە بوارە جیاوازەکاندا
- پێداچونەوە بە دەستوری رێکخراوەیی، هەڵسەنگاندن و دەستکاریکردنی پلاتفۆرمەکانی هەڵبژاردنەکانی پارێزگا و هەرێم و عێراقی فیدراڵ.
- هەڵسەنگاندنی ئەدای تیمەکانی بزوتنەوەی گۆڕان لە حکومەت و نوێنەرەکانی لە دەزگا هەڵبژێردراوەکانی؛ پارێزگا، هەرێم و عێراقی فیدراڵ.
- هەڵسەنگاندنی ئەدای جڤاتی نیشتیمانی لە چەند ساڵی رابردودا.
هەمو ئەمانەش پڕۆسەی سەرلەنوێ خۆڕیکخستنەوە و خۆنوێکردنەوەی بزوتنەوەی گۆڕانە بەتایبەت دوای ئەنجامی هەڵبژاردنی ئەنجومەنی نوێنەرانی عێراق کە بزوتنەوەی گۆڕان نەیتوانی تێیدا دەنگی پێویست بەدەستبهێنێت.