ئاراس جەبار، شارەزای كەشناسی لە راگەیەنراوێكدا رایگەیاندووە "سبەینێ لە ئەنجامی بەردەوامی كاریگەری نزمەپاڵەپەستۆی دەریای ناوەراست ئاسمانی ھەرێم  بەزۆری دەگۆرێتەوە بۆ نیمچە ھەور و ھەوری تەواو، لەكاتەكانی نیوەرۆ بە دواوە تا كاتەكانی شەو شەپۆلێكی بارانبارین بەرێژە و كاریگەری جیاواز ناوچەكان دەگرێتەوە، بەتایبەت لە سنوری ناوچە شاخاویەكانی پارێزگای ھەولێر و دھۆك و ئیدارەی راپەرین چالاكتر دەبێت".  

ناوبراو ئاماژەی بەوەكردووە، ھەندێك كات بارانی بەخوڕ دەبارێت و ئەگەری بارینی ١٠ تا ٣٥ ملیمەتر باران ھەیە، لەناوچەكانی دیكەی ھەرێم كاریگەری لاواز بۆ مامناوەند دەبێت و باران لەھەندێ كاتدا دەبارێت بەشێوەی پچر پچر.  

ئاراس جەبار دەڵێت "خێرایی با كاتەكانی دوای نیوەرۆ بۆ ئێوارە چالاك دەبێتەوە لە ئاراستەی باشوری رۆژھەڵاتەوە بەخێرای ٢٠ تا ٣٥ كلم/س، بۆیە ئەگەری بەرزبوونەوەی تۆز و خۆڵبارین دەبێت بەتایبەت لەناوچەكانی سنوری ئیدارەی گەرمیان و پارێزگای كەركوك، بەڵام كاریگەری بەراورد بە شەپۆلی خۆڵبارینی ڕابردوو كەمتر دەبێت، پلەكانی گەرماش زیاتر بەجێگیری دەمێنێتەوە".