جۆ بایدن سەرۆکی ئەمەریکا لە نامەیەکدا بۆ نێچیرڤان بارزانی پاڵپشتی خۆی بۆ هەرێمی کوردستان دووپاتکردەوە.
راگەیاندنی سەرۆکایەتی هەرێم بڵاویکردەوە، رۆژی چوارشه‌ممه ٣٠ ی ئازار نێچیرڤان بارزانی، سه‌رۆكی هه‌رێمی كوردستان، پێشوازیی له ماتیو توله‌ر، باڵیۆزی ئەمریکا له عێراق كرد. بەپێی راگەیێندراوی سەرۆکایەتیی هەرێمی کوردستان، "له كۆبوونه‌وه‌یه‌كدا به‌ڕێز باڵیۆزی ئەمریکا نامه‌یه‌كی سه‌رۆك جۆ بایدن سه‌رۆكی ویلایەتە یه‌كگرتووه‌كانی ئەمریکای گه‌یاندووەتە سه‌رۆك نێچیرڤان بارزانی كه تێیدا جه‌خت له پشتگیریی ئەمریکا بۆ عێراق و هه‌رێمی كوردستان كراوه‌ته‌وه".
لە راگەیێندراوی سەرۆکایەتیی هەرێمی کوردستاندا هاتووە، لە کۆبوونەوەکەدا هه‌ردوولا دۆخی سیاسیی عێراق، هه‌نگاوه‌كانی پرۆسه‌ی سیاسی و كۆبوونه‌وه‌كانی ئه‌نجوومه‌نی نوێنه‌رانی عێراق، دۆخی هه‌رێمی كوردستان و پرۆسه‌ی هه‌ڵبژاردنه‌كانی داهاتووی هه‌رێمی كوردستان، په‌یوه‌ندییه‌كانی هه‌ولێر ـ به‌غدا و پێشبینییه‌كانیان بۆ داهاتووی پرۆسه‌ی سیاسی له وڵات تاوتوێ كرد.
له كۆبوونه‌وه‌كه‌دا هه‌ردوولا هاوڕا بوون له‌سه‌ر پێویستیی هه‌بوونی سیستمێكی حوكمڕانیی ته‌ندروست له عێراق له‌سه‌ر بنه‌مای متمانه و هاوبه‌شیی راسته‌قینه و پابه‌ندیی به ده‌ستوور و بنه‌ماكانیه‌وه كه ته‌نیا رێگه‌یه بۆ ئارامی و سه‌قامگیری و جه‌ختیان له گرنگیی بنیاتنانی متمانه و لێكگه‌یشتنی هاوبه‌شیی نێوان لایه‌نه عێراقییه‌كان بۆ تێپه‌ڕاندنی دۆخه‌كه و چاره‌سه‌ركردنی كێشه‌كان كرده‌وه.