وەزارەتی پێشمەرگەی حكومەتی هەرێمی كوردستان بەنیازە لەمەودوا هاوتەریت لەگەڵ شەڕی مەیدانی، شەڕی میدیایش لەگەڵ لایەنی بەرامبەر بەڕێوە ببات.
وەزارەتی پێشمەرگەی حكومەتی هەرێمی كوردستان راگەیەندراوێكی بڵاوكردەوە و رایگەیاندوە، ئەمڕۆ سیمینارێك لەبارەی (پێشمەرگە لەپرۆسەی نوێكردنەوەی تواناكانی هۆشیاریدا) بەڕێوەچوو كە تیایدا باس لە گرنگی ستراتیژیەتی شەڕی میدیایی كرا و تیشكیان خستە سەر خاڵە گرنگ و ئەرێنیەكانی پلاتفۆرمەكانی سۆشیال میدیا بەهەموو جۆرەكانییەوە.
راگەیەنراوەكە ئاماژەی بەوەكردووە "ئامادەبووان هاوڕابوون شەڕی میدیایی پلان و تاكتیكی شەڕ دەگۆڕێت و لەبەرژەوەندی ئەو لایەنە دەبێت، كە ئەزمونی هەبێت و بزانێت چۆن ئیدارەی دەكات و لەبەرژەوەندی ئەویش كۆتایی پێدێت، بەتایبەت ئێستا وڵاتانی زلهێز كار لەسەر پەرەپێدان و بەرەوپێشبردنی هونەرەكانی ئەو بوارە دەكەن".
هەروەها روونیكردۆتەوە، تەوەرێكی دیكەش گفتوگۆكردن بووە لەسەر كۆمەڵێك بابەتی میدیای سەربازی، لەوانەش چۆنیەتی مامەڵەكردن لەگەڵ رووداوەكان و بابەتە فكرییەكان.