پۆلیسی گەرمیان رایدەگەیەنێت، دوو برا لە كاتی گواستنەوەی تانكەری سووتەمەنیدا، بەهۆی كێشانی جگەرەیەكەوە گیانیان لەدەستدا.
موقەدەمی مافپەروەر، عەلی جەمال قەدوری، وتەبێژی پۆلیسی گەرمیان ئەمڕۆ شەممە ٩-٧-٢٠٢٢ رایگەیاندووە، شەوی رابردوو لە ناحیەی ڕزگاری سەر بە قەزای كەلار دووبرا كە ئۆتۆمبێلی گواستنەوەی سوتەمەنیان پێ بووە، لەكاتی دەرهێنانی بەنزین لەنێو تانكەرەكەیان بەهۆی زۆری غازی ناو تانكەرەكە و كێشانی جگەرە لەلایەن یەكێك لە دوو برایەی گیانیان لەدەستداوە، تانكەرەكەیان تەقییەوە و هەردووكیان لەنێو تانكەرەكەدا گیانیان لەدەستدا.
پۆلیسی گەرمیان ئاماژەی بەوەكردوە "ئەو دوو برایەی گیانیان لەدەستداوە بەناوەكانی مەڵبەند عەبدوڵا ڕەشید لەدایكبووی 1991 و ئازەر عەبدوڵا ڕەشید لەدایكبووی 1998 دانیشتووی قەزای كەلار، دوای دەرهێنانی تەرمەكان بەمەبەستی توێكاری ڕەوانەی پزیشكی دادوەری قەزای كەلار كران".