وەزارەتی پێشمەرگەی حكومەتی هەرێمی كوردستان لە راگەیەنراوێكدا رایگەیاندووە "ئەمڕۆ لە رووداوێكی نەخوازراودا، مەفرەزەیەكی حەشدی شەعبی، هەڵیانكوتاوەتە سەر (پ. م ئەیمەن عەبدی جاسم) پێشمەرگەی لیوای 9ی پیادەی سەر بە وەزارەتی پێشمەرگە، دوور لە هەموو عورف و یاسایەك، ئەم مەفرەزەیە زۆر بە شێوەیەكی ناشیرین سوكایەتیان بەو پێشمەرگەیە كردووە و كاری نەشیاویان بەرامبەر ئەنجام داوە".

 

وەزارەتی پێشمەرگە ئاماژەی بەوەكردووە "ئەم كردەوەیە جێگای قبوڵكردن نیە، داوا لە هێزە ئەمنیەكانی كەركوك دەكەین، كە دەستبەجێ، لیژنەی  لێكۆڵینەوە لەسەر ئەم پرسە پێك بهێنن و تۆمەتباران دەستگیر بكرێن و رووبەڕووی یاسایان بكەنەوە، بۆئەوەی هیچ كەس و لایەنێكی تر هەوڵ نەدات ئەم جۆرە كردەوە ناشیرنانە دووبارە بكاتەوە".

ئەمڕۆ پێشمەرگەیەكی كاكەیی لەلایەن چەكدارانی حەشدی شەعبییەوە دەستگیركرا و لەئەنجامدا بەشێك لە قژ و سمێڵیان تاشی و پاشان ئازادیان كرد.