ئەژی ئەمین لێپرسراوی لەکار لابراوی دەزگای پاراستن / زانیاری- زانیاری لە نوێترین لێدوانیدا لەبارەی کوژرانی عەقید هاوکار عەبدوڵا دەڵێت" ئەوەی دوێنێ ڕوویدا، لە پەلاماردانی ژن و منداڵ و سەربازە ونەکانی دەیسەلمێنێت کە بەکرێگیراو و جاشەكان داماڵراون لەهەموو پابەندبوونێکی ئەخلاقیی و ئینسانی".
ئەژی ئەمین لە نوێترین لێدوانیدا کە بۆ یادی لە دایکبوونی پێغەمبەر ( د.خ) بڵاویکردۆتەوە، ئەو هەلەی قۆستۆتەوە بۆ قسە کردن لەبارەی عەقید هاوکارەوە دەڵێت " چۆن لەدایکبوونی ئەو پەیامبەرە کۆتایی هاتنی کۆیلایەتی بوو، هیوادارین ئەمساڵ دواساڵی کۆیلە و بەکرێگیراوەکانی بێگانە بێت".
هەروەها دەشڵێت " ئەوەی دوێنێ ڕوویدا، لە پەلاماردانی ژن و منداڵ و سەربازە ونەکانی ڕووبەڕووبوونەوەی تیرۆر و پاراستنی ئەمنیەتی هەرێمی کوردستان دەیسەلمێنێت کە بەکرێگیراو و جاشەكان داماڵراون لەهەموو پابەندبوونێکی ئەخلاقیی و ئینسانی."
لە کۆتایی پۆستەکەیدا ئەژی ئەمین دەڵێت " ئەو بارودۆخەی کە بەهۆی چەند هەرزەیەکی مافیائاساوە بەتایبەت لە ناوچەیەکی هەرێمی کوردستان هاتۆتە ئاراوە و کاریگەری خراپی لەسەر کۆی بارودۆخی ناوچەکە داناوە و بووەتە مەترسی بۆ سەر ئەزموون و ئاسایشی هەرێمی کوردستان، چیتر مایەی قبوڵکردن نییە و دەبێت بۆ ڕاگرتنی هەموومان ئەرک و بەرپرسیارێتی سەرشانمان قبووڵ بکەین".