ئاسایشی سلێمانی شكست پێهێنانی پلانێكی داعشی راگەیاند كە شەوی رابردوو لەسنوری چەمچەماڵ روویدا و بەو هۆیەوە دوو چەكداری داعش كوژران.
دەقی راگەیەنراوی ئاسایشی سلێمانی..
بەڕێوەبەرایەتی ئاسایشی رۆژئاوای سلێمانی پیلانێكی تیرۆریستانی داعش بۆ تێكدانی ئاسایشی ھەرێم شكست پێدەھێنن و لە ئۆپراسیۆنێكیشدا دووچەكداری داعش دەكوژرێن و تیرۆرستێكی داعش كە ژنە بە برینداری دەستگیردەكرێت .
پاش ئەوەی رۆژی ٣ / ١١ / ٢٠٢٢ سێ تیرۆریستی داعش كە یەكێكیان ژن بوو لەقەزای چەمچەماڵەوە بەڕێكەوتن بۆ ناوچەی سەنگاو بە مەرامی بنیادنانی حەشارگەیەك بۆ تیرۆریستانی داعش و ئەنجام دانی چەند كردەوەیەكی تیرۆریستی لە شارەكانی ھەرێم كە پێشتر ئامادەكارییان بۆ كردبوو تا ژمارەیەك چەكداری تیرۆریستی تر بێنە ناوچەكە دەست بەجێبەجێكردنی پیلانەكانیان بكەن .
ھێزەكانمان لەسەر بنەمای زانیاری پێشوەخت بەدواداچوونیان بۆ جموجۆڵی تیرۆریستان كرد و ناوچەی سەنگاو خرایە ژێر چاودێری وردەوە كەدوای دڵنیابوون و وەرگرتنی رەزامەندی بەڕێز دادوەر ئۆپراسیۆنی دەستگیركردنی تاوەنبارەكان دەستیپێكرد و لەشەوی ٦ / ٧ ی ١١ ی ٢٠٢٢ لە شاخی ئاشداخ لەنزیك گوندی كچان لەناوچەی سەنگاو شوێن و جێگای تیرۆریستان دۆزرایەوە لەكاتی ھەوڵدان بۆدەستگیركردنیان رووبەڕووی ھێزەكانمان بوونەوە پاش ٣٠ دەقە توانرا ھەردوو تیرۆریست (ك، س م) و ( م ، ع ، م )
بكوژرێت و تیرۆریست ( ش ، ن ، ع ) بە برینداری دەستگیربكرێت .
زانیاری لەبارەی تیرۆریستەكانەوە
١-تێرۆریستی كوژراو (ك، س م) موالید (١٩٧٥ ) دانیشتوی قەزای چەمچەماڵ گەڕەكی ڕاپەڕینە ، خێزاندارەو سێ منداڵی هەیە و پێشینەی كاری توندڕەویی ھەبووە و بەیعەتیان بەتیرۆریستانی داعش داوەو پیلانیان ھەبووە چەند كردەوەیەكی تیرۆریستی ئەنجام بدەن و دوای بنیادنانی حەشارگە چەكدارانی داعش بێنە ناوچەكە .
۲- تێرۆریستی كوژراو (م ، ع ، م ) دانیشتوی چەمچەماڵ گەڕەكی ڕاپەڕین موالید ١٩٩٨ ، خێزاندارە هاوسەرەكەی بەناوی ( ش ، ن ، ع ) ئەندامی گروپەكەبووە
ھەردووكیان بەیعەتیان بە تیرۆریستانی داعش داوە و بەھەمان شێوە مەرامیان بووە چەند كردەوەیەكی تیرۆریستی ئەنجام بدەن .
٣- تێرۆریستی بریندار ( ش ، ن ، ع ) كە رەگەزی ژنە و هاوسەری تێرۆرست ( م ، ع ، م ) بەھەمان شێوە فكری تیرۆریستانی داعشی وەرگرتووەو بەیعەتی پێداون و ئامادەبووە بەشداری بكات لە كردەوە تیرۆریستیەكان .
لێكۆڵینەوەو بەدواداچون لەوبارەیەوە بەردەوامە
ڕاگەیاندن و پەیوەندیەكان
بەڕێوەبەرایەتی ئاسایشی ڕۆژئاوای سلێمانی