هەردوو حیزبەكانی (كۆمەڵەی زەحمەتكێشانی كوردستان و كۆمەڵەی شۆڕشگێڕی زەحمەتكێشانی كوردستانی ئێران) یەكگرتنەوەی خۆیان راگەیاند.
ئەمڕۆ لە شاری ستۆكهۆڵمی پایتەختی سوێد، حیزبەكانی (كۆمەڵەی زەحمەتكێشانی كوردستان و كۆمەڵەی شۆڕشگێڕی زەحمەتكێشانی كوردستانی ئێران) بە فەرمی یەكگرتنەوەیان راگەیاند.
عەبدوڵڵا موهتەدی، سكرتێری گشتی كۆمەڵەی شۆڕشگێڕی زەحمەتكێشانی كوردستانی ئێران رایگەیاند، دوای یەك ساڵ و نیو هەوڵی چڕوپڕ، ئەمڕۆ یەكگرتنەوەی هەردوو كۆمەڵە رادەگەیەنن.
بەپێی زانیارییەكان، ناوی كۆمەڵە دەبێتە كۆمەڵەی شۆڕشگێڕی زەحمەتكێشانی كوردستانی ئێران و رۆژانی داهاتوو بڕیاری كۆتایی لەسەر ئۆرگان و ناوەندەكانی دیكەی دەدرێت.
كۆمەڵەی زەحمەتكێشانی كوردستان ساڵی 2007 لە كۆمەڵەی شۆڕشگێڕی زەحمەتكێشانی كوردستانی ئێران جیابووەوە و عومەر ئیلخانیزادە سكرتێری گشتیی حیزبەكە بوو.