نێچیرڤان بارزانی، سەرۆكی هەرێمی كوردستان (ماوە درێژكراوە) و رەجەب تەیب ئەردۆگان، سەرۆكی توركیا جەختیان لە پەیوەندییەكانی هەردوولا كردەوە.
نێچیرڤان بارزانی، سەرۆكی هەرێمی كوردستان (ماوە درێژكراوە) ئەمڕۆ سەردانی توركیای كردووە و لەگەڵ رەجەب تەیب ئەردۆگان، سەرۆكی ئەو وڵاتە كۆبۆوە.
بەپێی راگەیەندراوێكی سەرۆكایەتی هەرێم، لەكۆبونەوەكەدا پەیوەندییەكانی عێراق و هەرێمی كوردستان لەگەڵ توركیا، دۆخی سیاسیی عێراق و هەرێمی كوردستان، بەتایبەتی دوای دەستبەكاربونی كابینەی نوێی حكومەتی فیدراڵیی عێراق، پەیوەندییەكانی هەولێر ـ بەغدا و گفتوگۆی چارەسەركردنی كێشەكانی نێوانیان و دەرفەتەكانی هاریكاریی عێراق و هەرێمی كوردستان لەگەڵ توركیا لە بواری وزەدا، تاوتوێكران.
راگەیەندراوەكە ئاماژەی بەوەكردووە، هەردوولا جەختیان لە خواستی دولایەنە بۆ برەودان بە پەیوەندییەكانی هەرێمی كوردستان و توركیا لە هەمو بوارەكاندا كردەوە، بەتایبەتیش بواری بازرگانی و ئابوری و سودوەرگرتن لەو دەرفەتانەی بۆ فراوانكردنی هاریكاریی هاوبەشی عێراق و هەرێمی كوردستان لەگەڵ توركیا لە بواری وزەدا هاتونەتە ئاراوە كە دەكرێت ڕۆڵی كارای هەبێت لە پڕكردنەوەی ئەو بۆشایی و پێویستییەی ئەمڕۆ لە جیهان و بەتایبەتی لە ئەوروپا لە بواری وزە و گازی سروشتیدا دروستبوە.