لاهور جەنگی لەسەر هێرشەکەى سەر فڕۆکەخانەى سلێمانی هاتە دەنگ و ڕایدەگەیەنێت" یەکتر تەخوین کردن و موزایەدەی سیاسی خزمەت بە هیچ لایەک ناکات، ناکۆکییەکانی پارتی و یەکێتی لەسەر شێوازی حکومڕانی و ئیدارەدانی سلێمانی گەیشتۆتە ئاستی لێکترازان".
لاهور جەنگی لە ڕاگەیەندراوێکدا کە خۆی وەک هاوسەرۆکی یەکێتی نیشتیمانی کوردستان ناساندووە، دەڵێت" لە دوای بڕیاری داخستنی ئاسمانی تورکیا بە رووی فرۆکەخانەی نێودەوڵەتی سلێمانی و مەترسی لێکەوتەکانی ئەو بڕیارە وایکرد کە بەردەوام چاودێری دۆخەکە بکەم، هەر لەو چرکە ساتەوە و لەپێناو بەرژەوەندییە باڵاکانی میللەتەکەم پەیوەندییەکانی خۆم خستۆتە گەڕ بۆ رێگرتن لە تەشەنە سەندنی گرژییەکان، ئیدانەی ئەو رووداوەی ناو فرۆکەخانەی نێودەوڵەتی سلێمانی و تێکدانی ئارامی و سەقامگیری شاری سلێمانی و خەڵکە تێکۆشەرەکەی دەکەم".
دەشڵێت" وڵاتانی دراوسێ دەبێت لە رێگەی دیالۆگ و کەناڵە رەسمیەکانەوە کێشەکانیان چارەسەر بکەن، داواکارم لایەنە سیاسیەکانیش لە هەرێمی کوردستان دان بەخۆیاندابگرن تا ئەنجامی لێکۆڵینەوەکان دەردەکەون".
ئاماژەی بەوەشکردووە" پێویستە هەڤاڵانمان لە رۆژئاوا بە ورریاییەوە مامەڵە لەگەڵ دۆخەکە بکەن و بزانن کە دۆخی ئێستای سلێمانی وەک پێشتر نیە و رووداوی کەوتنە خوارەوەی دوو هەلیکۆپتەرەکە و رووداوەکەی دوێنێ بەرئەنجامی ئەو شێوازی سیاسەتکردنەیە کە ئێستا لە سلێمانی دەگوزەرێت".
هەروەها لاهەور جەنگی ڕاشیگەیاندووە" ڕابردوو سەلماندوویەتی کە هاوکاریکردنی خوشک و براکانمان لەهەر پارچەیەکی کوردستان بە ئەرکی نەتەوەیی خۆمان زانیوە، بەڵام ناکرێت خەڵکی کوردستان باجی هەڵە و عینادی سیاسییەکان و خراپ بەکارهێنانی دەسەڵات و کاری نا عەقڵانی بدەن و بە دروشمی موزەیەفی کوردایەتی ختوکە بدرێن، یەکتر تەخوین کردن و موزایەدەی سیاسی خزمەت بە هیچ لایەک ناکات، ناکۆکییەکانی پارتی و یەکێتیی لەسەر شێوازی حکومڕانی و ئیدارەدانی سلێمانی گەیشتۆتە ئاستی لێکترازان، ئەوانەی بەراستی خەمی ژیان و گوزەرانی خەڵکی کوردستانیانە و لە هەستیاری ئەم قۆناغە تێدەگەن بەتایبەت کە ئێستا رێککەوتنێک لە ئارادایە لەگەڵ بەغدا کە هەنگاوێکە بۆ بوژاندنەوەی ئابووری و باشبوونی ژیان و گوزەرانی هاووڵاتیان و موچەخۆران، دەبێت باش بزانن کە لە ئێستادا دەستبەردار بوون لە تاکڕەوی سیاسی و لێکتێگەیشتن و کاری پێکەوەیی بۆ دۆخی هەرێمی کوردستان بەگشتی و دۆخی نا ئارامی سلێمانی بەتایبەتی لە هەموو شتێک گرنگترە".
وتیشی" نابێت رێگە بدەین ژیان و گوزەرانی هاووڵاتیان و دۆخی بازاڕ و کاسبکاران و ئاشتی کۆمەلایەتی تێک بچێت، سلێمانی و خەڵکە تێکۆشەرەکەی قوربانی زۆریان داوە، شایەنی ئەوە نین لەوە زیاتر سزا بدرێن و لەو نا ئارامییەدا بمێننەوە".