لاهور شێخ جەنگی هاوسەرۆکی پێشووی یەکێتی لە پەیامێکدا لە بارەی بارگرژییەکانی کەرکوکەوە داوا لە هەموو لایەنە سیاسییەکانیش دەکات، چیتر رۆڵەی کورد نەکەنە قوربانیی ململانێ " ناشەریفانەکانیان لەپێناو هەڵبژاردن و چیتر ئەجێندای ئیقلیمی جێبەجێ نەکەن".
لە پەیامێکدا لاهور شێخ جەنگی دەڵێت " بەداخەوە جارێکیتر کورد لە کەرکوک بووە قوربانی ململانێی نێوان لایەن سیاسییەکان و خوێنی گەنجی کوردی ئەو شارە خۆشەویستە بە ناهەق رژا".
لاهور جەنگی داوا لە هەر سێ سەرۆکایەتییەکەی عێراق دەکات و دەڵێت "بۆ رێگریکردن لەم خوێنڕشتنە و تەشەنە نەسەندنی دۆخی دژواری شاری کەرکوک، بە زووترین کات رۆڵی دەستوریی خۆیان ببینن و رێگە نەدرێت رێوشوێنی نادەستوری لەو شارە ئەنجام بدرێت کە ببێتە مایەی تێکدانی پێکەوەژیانی ئاشتییانەی نێوان پێکهاتە ڕەسەنەکانی کەرکوک".
هەروەها دەڵێت " ڕێگەش نەدرێت بەناوی پاراستنی هاووڵاتیییانی شارەکە، کورد لە کەرکوک بچەوسێندرێتەوە، چونکە هەرگیز ئەم زوڵم و ستەم و سەرکوتکردنە مایەی قبووڵکردن نییە".
"ئەم دۆخە هەستیارە دەخوازێت کە هاووڵاتیانی شارەکە دانبەخۆیان دابگرن و خەڵکی دەستەبژێر و پێکهاتە رەسەنەکانی شارەکەش هەوڵی جدی بدەن بۆ کۆتاییهێنان بە گرژییەکان لە پێناو پاراستنی پێکەوەژیانی سەرجەمی پێکهاتەکان. ( لاهور جەنگی ئاماژەی بۆ دەکات ).
هاوسەرۆکی پێشووی یەکێتی دەڵێت "خەڵکە خۆشەویستەکەمان لەکەرکوک دڵنیا دەکەمەوە کە بەتەنیا جێناهێڵین و لەسەر هێڵین بۆ هێورکردنەوەی دۆخەکە و لەو پێناوەشدا تەواوی هەوڵەکانی خۆمان خستۆتە گەڕ".
ئەمڕۆ لە خۆپیشاندانێکی هێمنانەی هاوڵاتیانی کورد بارگژی دروستبوو لە ئەنجامدا دوو هاوڵاتی کورد کوژران و پێنجی تر بریندار بوون.