ئاراس جەبار شارەزای بواری کەشوهەوا، بەیانی ئەمڕۆ چوارشەممە لە ڕاگەیەندراوێکدا بڵاویکردەوە" سبەینێ پێنجشەمە ئاسمانی ناوچەکانی باشوری ھەرێم بە زۆری نیمچە ھەور دەبێت، بەڵام لە ناوچەکانی ناوەڕاست و باکووری ھەرێم ساماڵ و پەڵە ھەور دەبێت، پلەکانی گەرما بەراورد بە ئەمڕۆ جێگیر دەبێت و کاریگەری شەپۆلی بەفر و بارانبارین لە کاتەکانی بەرەبەیانەوە لە ناوچەکانی باکوری سعودیە و باشور و ڕۆژئاوای عێراقەوە دەستپێدەکاتەوە، بەفر لە بەرزاییەکاندا دەبارێت لەگەڵ نزمبوونەوەی بەرچاوی پلەکانی گەرما". 

ئاماژەی بەوەشکردووە، لە کاتەکانی ئێوارە بە دواوە بارانی مامناوەند و پچر پچر درێژ دەبێتەوە بۆسەر ناوەڕاستی عێراق و ناوچەکانی سنووری ئیدارەی گەرمیان، پارێزگای ھەڵەبجە، سلێمانی و کەرکوک کە بەشێوەیەکی گشتی بەھۆی نزمبوونەوەی پلەکانی گەرما لە سەرجەم ناوچە شاخاوییەکانی پارێزگای سلێمانی و ھەڵەبجە ئەگەری بەفربارین هەیە. 

ئەوەشی خستەڕوو، لە سەنتەری شاری سلێمانی و ئەو ناوچانەی بەرزیان زیاترە لە (٨٠٠) مەتر لە ئاستی ڕووی دەریا پێشبینی دەکرێت لە کاتەکانی نیوەی شەو بە دواوە بەفر ببارێت، کاریگەری ئەو شەپۆلە بۆ ناوچەکانی پارێزگای دھۆک، ھەولێر و ئیدارەی ڕاپەرین لاواز دەبێت و تەنھا ئەگەری نمە باران لەھەندێک کاتدا دەبێت لەو ناوچانەدا، بای باکوری ڕۆژھەڵات بۆ سبەینێ و دوو سبەی بە چالاکی دەمێنێتەوە و لە ناوچەکانی پارێزگای سلێمانی بەخێرای (١٠ تا ٣٠) کیلۆمەتر دەبێت لە کاتژمێرێکدا.