ئەمڕۆ یەک شەممە ١١ی شوبات جارێکی تر مامۆستایانی ناڕازی لە سلێمانی چەند شارو شارۆچکە دەستیان بە خۆپیشاندان کردەوە، ئەوە لە کاتێکدایە کە چەندان ناوەندی خوێندن بایکۆتیان شکاندووەو خوێندکاران و مامۆستایان چوونەتەوە پۆلەکانیی خوێندن.

پەیامنێری سلێمانی ماڵپەڕی ( سپی ) ئاماژە بۆ ئەوە دەکات کە هەرچەندە ژمارەی مامۆستایان و فەرمانبەرانی ناڕازی بەراورد بە هەفتەکانی پێشوو کەمترە، بەلآم ئەوانەی لەسەر شەقامن لە لێدوان و دروشمەکانیاندا جەخت لەسەر سووربوون لەسەر خۆپیشاندان و بایکۆتکردن دەکەنەوە و، چەندان دروشم دژی حکومەتی هەرێم دەڵێنەوە.

وەزارەتی پەروەردە بە فشاری جۆراو جۆر و سزاو دەیەوێت مامۆستایانی ناڕازی بگەڕێنێتەوە پۆلەکانی خوێندن، بەلآم ژمارەیەکی بەرچاویان سوورن لەسەر بەردەوامی لە بایکۆتکردن.

ماوەی پێنج مانگە لە ناوچەکانی هەردوو پارێزگای سلێمانی و هەڵەبجە و هەردوو ئیدارەی گەرمیان و راپەڕین و کۆیە مامۆستایانی ناڕازی بایکۆتیان راگەیاندووەو سوورن لەسەر داواکارییەکانیان کە سەرەکیترینیان پێداگرتنە لەسەر پێدانی مووچە لە کاتی خۆیداو دامەزراندنی مامۆستایانی وانەبێژ و کردنیان بە مامۆستای هەمیشەیی.