سەرۆکی یەکێتی ڕایگەیاند"ھەر لێپرسراوێکی حزبی ناونیشانەکەی بۆ بەرژەوەندیی تایبەت بەکاربھێنێت لێپێچینەوەی توندی لەگەڵ دەکەین".
بافڵ تاڵەبانی، سەرۆکی یەکێتی لە دەباشان لەگەڵ لێپرسراوی مەڵبەندەکانی یەکێتی کۆبووەوە و لە کۆبوونەوەکەدا کە دەرباز کۆسرەت رەسوڵ و ئەندامانی مەکتەبی سیاسی ئامادەبوون، تیشک خرایە سەر راپۆرتێك لەبارەی راسپاردە و پێشنیارەكانی دووەمین كۆنفرانسی مەكتەبی رێكخستن خستەڕوو و شێوازی رێكخستنەوەی ئۆرگانەكانی روونكردەوە.
بافڵ تاڵەبانی ستایشی رێكخستنەكانی یەكێتیی كرد بۆ بەجێگەیاندنی ئەركە حزبییەكان و وتی" بەرپرسیارێتیی هەموو یەكێتییەكانە لە هەر پلە و پایەیەكدا بن كار بۆ خزمەتی كوردستان و بەدیهێنانی ئامانجە باڵاكان بكەن".
بافڵ تاڵەبانی راشیگەیاند" یەكێتیی نیشتمانیی كوردستان بەرپرسیارە لە ژیان و گوزەرانی خەڵكی كوردستان، بۆیە دەبێت سەرجەم ئۆرگانەكان لەخزمەت خەڵك و گەیاندنی داواكارییەكانیاندا بن".
ئاماژەی بەوەشدا، پاراستنی ژیانی خەڵك و ئارامیی كوردستان بۆ ئێمە لەهەموو شتێك پیرۆزترە، بۆیە جارێكیتر دووپاتی دەكەینەوە هەر لێپرسراوێک لە هەر بەرپرسیارێتییەكی حزبی، حكومی و ئەمنیدا بێت و ناونیشانەكەی بۆ بەرژەوەندیی تایبەت بەكاربهێنێت، لێپێچینەوەی توندی لەگەڵ دەكەین و رادەستی یاسای دەكەین.
سەرۆکی یەکێتی وتیشی" دەستدرێژیكردنە سەر خەڵك و مافەكانیان هێڵی سوورە و یاساشكێنی قبووڵكراو نییە، بۆیە ئەركی هەموو یەكێتییەكە پارێزەری ژیان و گوزەرانی خەڵك بێت و هەموو هەوڵێكیان لەپێناو چاكەی گشتیدا بێت".