به‌رێوبه‌ری پێشووی که‌ناڵی رووداو، رێبوار که‌ریم وه‌لی له میانه‌ی وتارێکیدا ده‌ڵێت " دەستێوەردانی پەكەكە لە شەڕ و بەرەكانی جەنگ كە پتر لایەنی پڕوپاگەندەیی(چەقاندنی ئاڵای پەكەكە و وێنەگرتنی) هەبووە و، بە مەبەستی هاندانی خەڵك لەدژی دەسەڵاتی كوردستانی باشوور ".
رێبوار که‌ریم وه‌لی که ئێستا ئه‌ندامی ده‌سته‌ی به‌رێوبردنی رووداوه له‌میانه‌ی وتارێکیدا که له‌ماڵپه‌ری ده‌زگاکه‌ی بڵاویکردۆته‌وه‌‌و رووداویش جه‌خت ده‌کاته‌وه که وتاره‌که‌ی ته‌عبیر له ده‌زگاکه ناکات ده‌نوسێت " پەكەكە ئەوە بە خۆی رەوا دەبینێ كە لە بری بەشداریكردنی چەند سەد كەسێكی لە تێكڕای سنووری شەڕی داعش(كە نزیكەی 1000 كیلۆمەترە و ئەگەر هەر كیلۆمەتریك یەك كەسیان بەشداربێت، بەشی نیوەی بەرەی جەنگیش ناكەن!) داوای هەق لە ئیدارەی كوردستانی باشوور بە گشتی و پارتی بە تایبەتی بكات."
رێبوار که‌ریم وه‌لی یه‌کێکه له نوسه‌ره نزیکه‌کانی پارتی‌و پێشکه‌شکاری دوو پرۆگرامه له تۆڕی میدیایی رووداو، هه‌روه‌ها خاوه‌نی گۆشه‌یه‌کی هه‌فتانه‌یه له رۆژنامه‌که‌دا.
ئه‌مه‌ش ده‌قی وتاره‌که‌ی رێبوار که‌ریم وه‌لییه
پەكەكە كوردە و پارتی خائینە
رێبوار كەریم وەلی
شەڕی داعش بە شێوەیەكی بەرنامە بۆ داڕێژراو ، پەكەكە و هێزە چەكدارە جۆربەجۆرەكانی ئەو حیزبەی هێنایە ناو هاوكێشەی سەربازیی كوردستانی باشوور. لە كاتێكدا دوای ئەو هەموو ساڵە كورد پێشمەرگەكانی باشووری پێ رێكنەخرابووەوە و هەوڵی یەكخستنەوەی دەدان، پەكەكە سێ چوار هێزی دیكەی بە ناوی یەپەگە، یەپەژە و كەجەكە و چەندین یەكەی دیكە خزاندە ناو فەرهەنگ و واقیعی سەربازیی كوردستانی باشوور و بەشەكانی دیكە. ئەو كردارەی پەكەكە لەكاتێكدایە كە پارچەكانی دیكەی كوردستانی بە هەموو شێوەیەك بۆ خۆی قۆرخكردووەو، چوونی پێشمەرگەش بۆ كۆبانی ئەگەر لە ناچاری نەبووایە، خواستی راستەقینەی پەكەكە نەبوو. كردەیەكی تاكتیكی بوو كە هەم مەشروعیەتی مانەوەی هێزەكانی خۆی لەبەرەكانی شەڕی كوردستانی باشوور جێگیر بكات، هەمیش بەرپرسیارێتی شكستی خۆی لە كۆبانێ دابەش بكات.
ململانێی پەكەكە لەگەڵ پارتییە و، ئامانجیشی بەرزەفتكردن و سنوورداركردنی هەژموونی پارتییە لە باكور و رۆژئاوا، بۆیە ئەمجارە شەڕی خۆی لەگەڵ پارتی هێناوەتە ناو گۆڕەپانی پارتی و لەوێ بەرگری دەكات. پەكەكە كە بە ناچاری و بەشێوەیەكی تاكتیكی ملی بۆ رێككەوتنامەی دهۆك كەچ كرد(رێككەوتنێك كە وادەكات هێزە سیاسییەكانی دیكەی رۆژئاوای كوردستانیش لە ئیدارە و بەرگریی رۆژئاوا بەشداربن) ئێستا لە دوای شكاندنی گەمارۆی سەر چیای شنگال دەیەوێ بە دانیشتوانی ئەوێ تۆڵە لە پارتی بكاتەوە. ئەو باش دەزانێ كە سبەی رۆژێ دوای ئەوەی داعش شكا دەبێ هێزی هاوبەشی پارتی و یەكێتی كە لە كۆبانی شەڕی داعشیان لەگەڵدا دەكەن ، بكشێنەوە و بگەڕێنەوە ناو كوردستانی باشوور و، كەس ناتوانێ لەوێ هیچ دواكاریەكی هەبێت، بەڵام پەكەكە ئەوە بە خۆی رەوا دەبینێ كە لە بری بەشداریكردنی چەند سەد كەسێكی لە تێكڕای سنووری شەڕی داعش(كە نزیكەی 1000 كیلۆمەترە و ئەگەر هەر كیلۆمەتریك یەك كەسیان بەشداربێت، بەشی نیوەی بەرەی جەنگیش ناكەن!) داوای هەق لە ئیدارەی كوردستانی باشوور بە گشتی و پارتی بە تایبەتی بكات. جێگەی سەرسوڕمانە كە لەكاتێكدا پارتی و یەكێتی، هیچ نوێنەرایەتییەكیان لە یەك ناوچەی باكوری كوردستاندا نییە، پەكەكە بارەگای لە جەلەولا هەبێت!
لێدوانەكانی ئەم دواییەی سەرانی سەربازی و باڵی سیاسیی پەكەكە لە ناو توركیا، جێگەی هەڵوەستەی قووڵن و، لەو مانایە تەجاوز دەكەن كە كورد شانبەشانی یەكتری شەڕی داعش بكەن.(لەسەرەوە شەڕێكی گەرم لەگەڵ گرووپێكی تووندڕەو كە بە هەندێك لێكدانەوە، بە یەك رێژە دوژمنی هەمووان نییە، بۆیە ناكرێ پێیبگوترێ دوژمنی هاوبەش. لە ژێرەوەش شەڕێكی سارد).
دوو تەوژمی بیری دەوڵەتی كوردیی بارزانی و پێناسەكردنی كوردایەتیی پەكەكە دەمێكە لە پێكهەڵخشانی بەردەوامدان. پەكەكە لە دەرەوەی خۆی و رێكخراوە جۆربەجۆرەكانی، كەسی دیكەی پێ كورد نییە و، بگرە بە خائینیشیان دەزانێ، چونكە لەگەڵ ئەودا نین. لەو بەینەشدا ئەو پێناسە و سیاسەتەی پەكەكە لە هەموو شوێنەكانی كوردستان هەم كڕیاری هەیە و، هەمیش لەلایەن ئێران و دەستوپێوەندەكانی پڕوپاگەندەی بۆ دەكرێت. كار و كرداری میدیاكانی یەكێتی و پەكەكە كە هاوپەیمانی ئێرانن، بەدرێژایی چەند ساڵی رابردوو بە رێنمایی ئێران پەرەدان بووە بەو تێزەی كە پەكەكە كوردە و ئەوانیدیكە و بە تایبەتیش پارتی خائینن.
دەستێوەردانی پەكەكە لە شەڕ و بەرەكانی جەنگ كە پتر لایەنی پڕوپاگەندەیی(چەقاندنی ئاڵای پەكەكە و وێنەگرتنی) هەبووە و، بە مەبەستی هاندانی خەڵك لەدژی دەسەڵاتی كوردستانی باشوور و قایمكردنی جێ پێی خۆی بووە، زەنگێكی مەترسیدارە بۆ دوای شەڕی داعش. زەنگێك كە هۆشداری دەدات لەبارەی شەڕی خۆ بەخۆ و دابەشبوونەوەی كوردستان و، كاولكاریی زیاتر.