بنەماڵەی حسێن مەنسور سوپاسی خەڵكی كوردستان دەكەن
شەهید لیوا حسێن مەنسور
بنەماڵەی شەهید لیوا حسێن مەنسور و مەڵبەندی 8ی رێكخستنی خانەقین سوپاسنامەیەك خەڵكی كوردستان ئاراستەی خەڵكی كوردستان دەكەن بە بۆنەی بەشداریان لە رێوەڕەسمی هێنانەوەو ناشتنی تەرمی شەهید حسێن مەنسور.
دەقی سوپاسنامەكە:
(( سوپاسنامەیەك لە بنەماڵەی لیوا حوسین مەنسورەوە بۆ خەڵكی كوردستان ))
ئێمە وەكو بنەماڵەی شەهیدی نەمر (لیوا حوسین مەنسور )سوپاس و پێزانینی خۆمان ئاراستەی جەماوەری بەشەرەفی كوردستان بە گشتی و خەڵكی ناوچەكانی چەمچەماڵ و سلێمانی و دەربەندیخان و شارەزوور و گەرمیان و گەرمەسێر دەكەین ،كە لە رێورەسمی هێنانەوەی تەرمەكە لەپێشوازی دا بوون ، یان ئەوانەی لەگەڵ ئاپۆرەی هێنانەوەی تەرمەكە ئامادەبوون،هەروەها هەموو ئەو كەسایەتیە سیاسی و حكومیانەی ، كە لە كاتی ناشتن و بەخاك سپاردنی ئامادەبوون ، سوپاسی پێی پایانیشمان بۆهەموو كۆمەڵانی خەڵكی كوردستان ، كە هاوسۆز و هاوخەممان بوون، چ ئەوانەی بە بروسكە یان بە پەیوەند تەلەفونی یان لە پرسەكەدا ئامادەبوون .
لەناخی دڵمانەوە وەفا و خۆشەویستی خۆمان بۆ ئەم خاك و نیشتمانە دووپات دەكەینەوە ، بەلێن دەدەین، كە رۆڵەی بەئەمەكی پاراستنی ئەم كوردستانە بین هەركاتێك پێوست بكات ، شەهید ئاسا پڵنگی نێو سەنگەرەكانی پێشەوەی بەرگری بینوبەردەوام بین لەسەر رێبازەكەی شەهیدی نەمر ، كە رێبازی كوردایەتی و مەردایەتی بوو ، جارێكی تر سوپاس بۆ هەموو لایەك و خوای گەورەش سەبوری هەموو لایەكمان بدات .
موحسین مەنسوربرای شەهید لەجیاتی بنەمالًە
4/2/2015 /خانەقین
سوپاسنامەی مەڵبەندی 8ی رێكخستنی خانەقین
(( سوپاسنامەیەك لە مەڵبەندی 8ی رێكخستنی خانەقینەوە ))
مەڵبەند 8ی رێكخستنی خانەقین ، بەگەرمی دەست خۆشیتان لێدەكات، بۆ ئەو هەموو دڵسۆزی و وەفاییەی ، كە لە هێنانەوە و بەخاك سپاردنی تەرمی پیرۆزی شەهیدی فەرماندە لیوا حوسین مەنسور نواندتان ، سوپاس و پێزانینی خۆمان ئاراستەی سەرجەم جەماوەری بەشەرەفی كوردستان دەكەین ، بەتایبەتیش هەموو ئەوانەی كە هاوسۆز و هاوخەممان بوون ، بە هەموو پلە و پایەكانەوە چ سیاسی و چ سەربازی و چ كەسایەتی ، ئەم رێز و وەفایە بۆ خوێنی شەهیدان ئەوە ئەگەێنێت ، كە لە ناخی هەر یەكێك لە رۆڵە بە ئەمەكەكانی ئەم گەلە ستەم دیدەیە ، عەشقێك ڕواوە ، كە ئەویش عەشقی خاك و نیشتمانە . هەر ئەمەش بۆتە هەوینی برایەتی و یەك ریزی و یەك هەڵویستی لەبەرامبەر دوژمنە سەرسەختەكانمان ، بۆیە رۆڵە بەجەرگەكانی گەلەكەمان پۆل پۆل بەعەشق دەچن بەرەو پیری مەرگ لە پێناو پاراستنی سەروماڵی هاوڵاتیان و پاراستنی خاكی پیرۆزی كوردستان ، لەبەرامبەر هێرشەكانی هێزە تیرۆرستیەكان .
شەهیدی نەمر لیوا حوسین مەنسور بێ لەوەی فەرماندەیەكی ئازا و بوێر و چاو نەترسی گەلی كورستان و (ی.ن.ك) بوو ، كەسایەتێكی كۆمەڵایەتی بێ وێنەش بوو ، بەراستی لەناخەوە عاشقی خاكی كوردستان و ئاوێتەی ئازار و مەینەتیەكانی ئەم گەلە بوو ، لە ناو ئازاری ئەم گەلەش پەروەرە بوو بوو ، خەمی خاك و خەمی گەلی لەكۆڵنابوو، هەزار سڵاو لە گیانی بەرزە فری هەڵۆكەی گەرمیان ، شەهیدی فەرماندە لیوا حوسین مەنسور ، دڵنیاتان دەكەین هەموومان زیاتر لە جاران لە خەمی گەل و لە خەمی خاك بین و لەسەر رێبازەكەی مامی گەورەمان ، كە رێبازی كوردایەتیە بەردەوام بین ، بەلێنیش دەدەین و سویند دەخوین بە خوێنی پاكی شەهیدی نەمر ، كە وەفا دار بین بە ئەمەك بین ، بۆگەل و نیشتمان لە شارێی خەباتی بێ وچانی گەلی كوردستان لانەدەین و بەردەوام بین و قەڵغانی ئامادەكراوی بەرەنگاری سەنگەرەكان بین لەهەر كاتێك كە پێوست بێت .
ئەم كارەساتە لە ناخەوە هەموومانی هەژاند ، چونكە خۆشەویستی هەموومان بوو ، هەڤاڵ و برا و رۆڵەی بەئەمەكی كاتی تەنگانە بوو ، خوا سەبوری هەموو لایەكمان بدات ، بەتایبەتیش هاوسەر و دایك و خوشك و براو و كەس و كاری ، جارێكی تر هەزار سڵاو لە گیانی پاكی شەهید لیوا حوسین و سەرجەم شەهیدانی رێگای رزگاری كوردستان . هەرسەركەوتو بن..
مەڵبەندی 8ی رێكخستنی خانەقین
4/2/2015
PM:04:43:04/02/2015