سەرۆكی فراكسیۆنی گۆڕان لە پەرلەمانی كوردستان، روونكردنەوەیەك لەسەر قسەكانی پەرلەمانتارێكی ئەو فراكسیۆنە بڵاودەكاتەوە‌و رادەگەیەنێت وتەكانی ئەنوەر قادر بەهیچ جۆرێك گوزارشت لەرای بزوتنەوەی گۆڕان‌و فراكسیۆنەكەی ناكات.

ده‌قی‌ روونكردنه‌وه‌كه‌:

روونكردنەوەیەك لە سەرۆكی فراكسیۆنی گۆڕان لە پەرلەمانی كوردستان.

لە ژمارە (312)ی رۆژی (20/8/2015)ی گۆڤاری لڤین بەرێز ( ئەنوەر قادر مستەفا) پەرلەمانتاری فراكسیۆنی گۆڕان لەمەڕ پرسی سەرۆكایەتی هەرێم و رێكارەكانی لە پەرلەمانی كوردستان و رۆڵی یەكگرتووی ئیسلامی كوردستان و فراكسیۆنەكەی لە پەرلەمانی كوردستان چەند قسەیەكی كردوە.

ئێمە رادەگەیەنین كە ئەم قسە و بۆچونانەی كاك ئەنوەر تایبەت بە یەكگرتووی ئیسلامی كوردستان بە هیچ جۆرێك گوزارشت لە رای بزوتنەوەی گۆڕان و فراكسیۆنەكەی ناكات.

لەبەر ئەوەی هەر لە سەرەتای پرۆسەكەوە فراكسیۆنی یەكگرتووی ئیسلامی پرۆژەیان هەبووە بۆ هەمواری یاسای سەرۆكایەتی  هەرێم و چەسپاندنی سیستەمی پەرلەمانی و تا ئێستاش جەختی لەسەر دەكەنەوە.

بە شێوەیەكی گشتیش بەشێك لەو چەمك و مەفاهیمانەی كە كاك ئەنوەر لە چاوپێكەوتنەكەیدا بەكاریهێناون، گوزارشت لە سیاسەتی بزوتنەوەی گۆڕان ناكات.

 لێرەوە دووپاتی ئەوە دەكەینەوە كە پەیوەندی نێوان هەردوو فراكسیۆنی گۆڕان و یەكگرتوو لە پەرلەمانی كوردستان لەو پەری باشی بووە و هەوڵی پتەوتركردنیشی  دەدەین.

بزوتنەوەی گۆڕان بەردەوام دەبێت لە خەبات كردن بۆ ئەوەی بە شێوزای شارستانیانە پەیوەندی سیاسی خۆی لەگەڵ حیزب و لایەنە سیاسیەكان چاك بكات و پەرەی پێبدات لە پێناو حزمەتكردنی بەرژەوەندی گشتی.


لەگەڵ رێزدا...

برزۆ مجید
سەرۆكی فراكسیۆنی گۆڕان