بەپێی راگەیەنراوێكی وەزارەتی خوێندنی باڵا‌و توێژینەوەی زانستی ئاسانکاری بۆ وەرگرتنی خوێندکارانی ئێزیدی لە زانکۆکانی هەرێمی كوردستان دەكرێت.

سەرۆکی دەستەی باڵای بنکەی لالش هەوڵەکانی وەزارەتی خوێندنی باڵا و توێژینەوەی زانستی حکومەتی هەرێمی کوردستان بەرز دەنرخێنێت بۆ وەرگرتنی خوێندکارانی ئێزیدی لە زانکۆکانی هەرێمی كوردستان.

له‌ به‌رامبه‌ردا د.یوسف گۆران وەزیری خوێندنی باڵا و توێژینه‌وه‌ی هه‌رێمی كوردستانیش ڕایگه‌یاند: بەئەرکی سەرشانی خۆمانی دەزانین هەموو هەوڵێک بدین تا بتوانین خزمه‌ت پێشکەش به‌کوردانی ئێزیدی بکەین، هه‌ربۆیه‌ خوێندكارانی ئێزیدی لەگەڵ خوێندکارانی هەرێم جیاوازییان له‌گه‌ڵدا ناكرێت و وه‌ك یه‌ك مامه‌ڵه‌یان له‌گه‌ڵدا ده‌كه‌ین.

ئه‌و ڕاگه‌یاندنه‌ی د.یوسف گۆران، ئەمڕۆ یه‌ك شه‌ممه‌ ڕێکەوتی (20/12/ ٢٠١٥) له‌ میانه‌ی پێشوازیکردنی لە شێخ شامۆ شێخۆ ئەندامی پاڕلەمانی کوردستان و سەرۆکی دەستەی باڵای بنکەی لالیش هات.

 لە دیدارێکدا کە د. ئامانج عەبدولڵا ڕاوێژکاری وەزیر ئامادەیبو، شێخ شامۆ شێخۆ ئەندامی پاڕلەمانی کوردستان و، سەرۆکی دەستەی باڵای بنکەی لالیش ستایش و سوپاسگوزاری هەوڵەکانی وەزارەت و خودی وەزیری خوێندنی باڵا و توێژینەوەی زانستی کرد بۆ کارئاسانیکردنی خوێندکارانی ئێزیدی بۆ وەرگرتنیان لە زانکۆ و پەیمانگەکانی هەرێمی کوردستان و، لەبەرچاوگرتنی بارودۆخی ئیزیدییه‌كانی ناوچەکوردستانییەکانی دەرەوەی ئیدارەی هەرێمی کوردستان و، ئەنجامدانی رێککاری یاسایی ئیداری بۆ ئەو خوێندکارانە له‌ ڕێگه‌ی میوانداری و گواستنەوەیان بۆ زانکۆکانی هەرێمی كوردستان.

له‌ به‌رامبه‌ردا د. یوسف گۆران وەزیری خوێندنی باڵا و توێژینەوەی زانستی وتی: خزمەتکردن و کارکردن بۆ کوردانی ئێزیدی ئەرکیکی پیرۆز و شەرەفمەندایە بۆ ئەوەی بتوانین کەمێک لە ئازارو مەینەتیەکانی برا ئێزیدییه‌كانمان کەم بکەینەوە.

لەبارەی وەرگرتنی خوێندکارانی ئێزیدی ناوچە کوردستانیەکانی دەرەوەی ئیدارەی هەرێمی کوردستان لە زانکۆکانی هەرێم: وەزیری خوێندنی باڵا ڕایگەیاند هەموو هەوڵ و توانای زانکۆکانمان دەخەینە گەڕ بۆ وەرگرتنی خوێندکارە ئێزیدییه‌كان لە زانکۆکان، هه‌روه‌ك هەمان مەرج و رێنماییەکانی خوێندکارانی هەرێمیان بۆ پیادەدەکەین و جیاوازیان لەنێواندا ناکەین.   وتیشی بۆ ئەمساڵی خوێندن بەهەمان شێوە هاوکاری تەواوی خوێندکارە ئێزدییه‌كان دەکەین بۆ وەرگرتنیان یاخود میوانداریکردن و گواستنەوەیان.