بزوتنەوەی گۆڕان هەڵوێستی خۆی لەسەر كەمكردنەوەی موچەی فەرمانبەران رادەگەیاندو دەڵێت" بڕیارەكانی حكومەت باری سەرشانی خەڵكی قورس كردوە، بۆ چارەسەری قەیرانی داراییش پڕۆژەیەك دەدەنە لایەنەكان".
د.شۆڕش حاجی، وتەبێژی بزوتنەوەی گۆڕان بە ( میدیای گۆڕان)ی راگەیاند " بڕیارەكانی حكومەت بۆ كەمكردنەوەی موچەی فەرمانبەران، باری سەرشانی خەڵكی قورس كردوە".
ناوبراو لەدرێژەی لێدوانەکەیدا وتیشی "تەنها شتێک کە کراوە، کەمکردنەوەی موچەی هاوڵاتیان و فەرمانبەران بوە، بەڵام وەکو بزوتنەوەی گۆڕان لەگەڵ ئەوەین داهات زیاد بکرێت ئەویش لەرێگەی گەڕانەوەی داهاتی نەوت بۆسەر بودجەی گشتی و گێڕانەوە باج بۆ کۆمپانیا حیزبییەکان کە پێشتر باجیان نەدەدا و گرتنە بەری رێوشوێنی گونجاو بۆ گەڕانەوەی ئەو پاڵاوتگە نەوتییانەی لەلایەن حیزب و کۆمپانیا حیزبی و کەسەکانەوە بەڕێوە دەبرێت.
وتەبێژی بزوتنەوەی گۆڕان ئەوەشی خستەڕو، لە چەند رۆژی داهاتودا بزوتنەوەی گۆڕان پڕۆژەیەك بۆ چارەسەری قەیرانی دارایی رادەگەیەنێت و رادەستی لایەنە سیاسییەكانی دەكەن و بۆ رای گشتی بڵاودەكەنەوە.
رۆژی ٢/٣ حکومەتی هەرێم بڕیاری کەمکردنەوەی مووچەی مووچەخۆرانی دەوڵەتی دەکرد کە بۆتە مایەی ناڕەزایەتییەکی فراوانی خەڵک و لایەنەکان.