زانکۆی سلێمانی جەخت لەسەر بایکۆتکرد دەکاتەوە وەک " ناچارییەک"
هاوکات ئاماژە بۆ ئەوە دەکەن ئەگەر لەسەر بارودۆخی هەرێم پرس و رایان لەگەڵ بکرایە،
پێشنیاری باشیان دەبوو.
دەقی
ڕاگەیەندراوەکە:
لە روانگەی بەرپرسیارێتییەوە بۆ دۆخی ناهه‌مواری ئه‌مڕۆی هه‌رێمی
كوردستان و ئاینده‌ی پرۆسه‌ی خوێندنی باڵا، ئەنجومەنی زانكۆی سلێمانی لە
كۆبوونەوەی رۆژی یەكشەممەی 14/2/2016 ی جەخت لەسەر چەند خاڵێكی گرنگ دەكاتەوە، كه
ئەنجام و بڕیارو تێڕوانینەكان بەم شێوەیە بۆ زانكۆو حكومەتی هەرێم و رای گشتی ده‌خاته
روو:
1- ئەنجومەنی زانكۆ جەخت لەسه‌ر داوای
رەوای مامۆستایان و فەرمانبەران و خوێندكاران دەكاتەوە، وه‌ك ئه‌وه‌ی لە
پەیامەكانی رابردوودا ئاماژه‌مان پێداوه. هه‌روه‌ك جه‌خت له‌و راستییه ده‌كه‌ینه‌وه،
كه بایكۆتكردنی مامۆستایان و فەرمانبەران و خوێندكاران بایكۆتی پیشەیی و واقعی و
ناچارییە نەك دەستكردو سیاسی.
2- ئەنجوومەنی زانكۆ نیگەرانە لە
راوەستانی پرۆسەی خوێندن و نادیاری چارەنووسی خوێندكاران، له‌به‌رامبه‌ردا پێویسته
حكومەتی هەرێم به‌رپرسیارانه وه‌ڵامی داخوازی ره‌وای مووچه‌خۆران بداته‌وه‌و لەم
باروودۆخەدا لانیكەم گوێ لە داواكارییه كارگێڕی و پیشه‌ییه‌كانی زانكۆو مامۆستاو
فەرمانبەرو خوێندكاران بگرێت و نییەتی گەشبینی تێدا هەبێت.
3- ئەنجومەنی زانكۆ لەروانگەی هەستكردن
بە بەرپرسیارێتی سیاسی و زانستی و ئەمنی و پیشەیی و كارگێڕی و داراییەوەو دوور لە
هیچ ئەجێندایەكی سیاسییەوە ده‌ڕوانێته واقعی پرۆسەی خوێندنی زانكۆ.
4- لەم باروودۆخەداو سەرەڕای قەیرانی
دارایی و بڕیارەكانی حكومه‌ت بۆ كەمكردنەوەی مووچەی فەرمانبەران و مامۆستایان بەبێ
ره‌چاوكردن لە ئەركدا، ئەگەر پرسمان پێبكرایە ئەوا پێشنیازی زۆر زانستیمان دەبوو
كە بەداخەوە نەكرا! سەرەڕای ئەوەش سەرۆك و یاریدەدەران و راگرو یاریدەدەرانی راگرو
بەرپرسی بەشەكان و بڕیاردەره‌كانیان و بەتەحەمولكردنی ئەم دۆخە ناهه‌مواره‌و بەبێ
فشاری هیچ لایەن و ئاراستەیەك، رۆژانە ئەركی خۆیان ئەنجامداوەو بەردەوامن.
5- ئەنجومەنی زانكۆ لە رابردوو، و ئێستاو
داهاتوودا پەیام و بڕیاری ئەوەیە، كە دنه‌ی هیچ پرۆسەو چالاكییەكی هاندان نادات بۆ
بایكۆتكردنی مامۆستایان و فەرمانبەران و خوێندكاران، بەڵام لەهەمان كاتدا خۆیشی بە
دابڕاو دانانێت لە خه‌م و مه‌ینه‌تی و ناخۆشییه‌كانی مامۆستایان و
فەرمانبەران و خوێندكارانی زانكۆ، كه به‌هۆی ئه‌م دۆخه ناهه‌مواره‌وه رووبه‌ڕووی
بوونه‌ته‌وه‌و كاریگه‌ری خراپی له‌سه‌ر باری ده‌روونی و كۆمه‌ڵایه‌تی و ژیان و
گوزه‌رانیان داناوه.
6- ئەنجوومەنی زانكۆ لەسەرەتای پرۆسەی خوێندنی
ساڵی 2015-2016 دركی بەمەترسی ئەم دۆخە كردو پێشنیازی گونجاوی ئاراسته‌ی لایەنی
پەیوەندیدار كردو لەبەر چه‌ند هۆكارێكی بابەتی و بەرژەوەندی گشتی، هەمیشە جەختی
لەبەردەوامبوون لە پرۆسەی خوێندن دەكردەوە، بەڵام دواجارو لەبەر قورسی
باردوودۆخەكەو لەرووی دیفاكتۆوە وەك هەموو سێكتەرەكانیتر لە شاری سلێمانی و
بەناچاری لە 8/2 هەڵوێستی خۆی راگەیاند، كە چیتر ناتوانێت تەحەموولی ئەم بارودوخە
بكات.
7- ئەنجوومەنی زانكۆ، مامۆستاو
فەرمانبەرو خوێندكارانی سەرپشك دەكات لە بەردەوامبوون بەدەوامكردن، یان هەڵبژاردنی
هەر شێوازێكی مەدەنیانە بۆ گوزارشتكردن له داخوازییە پیشەییە رەواكانیان.
8- ئەنجومەنی زانكۆ، مامۆستایان و
خوێندكارانی ئەو كۆلێژانەی تا ئێستا تاقیكردنەوەی وه‌رزی یەكەمیان ئەنجام نەداوە،
یان لە نیوەدا جێیانهێشتووە سەرپشك دەكات بۆ ئەنجامدانی تاقیكردنەوەكانیان
بەڕەچاوكردنی واقعی ئێستاو دۆخی مامۆستایان و ئاینده‌ی خوێندكاران، پاش راوێژو هه‌ماهەنگی
لەگەڵ بەش و كۆلێژەكانیان.
9- ئەنجوومەنی زانكۆ، پشتیوانی داواو رای
راستەقینەو یاسایی و پیشەیی نوێنەرایەتی مامۆستایان و فەرمانبەران و خوێندكاران ده‌كات
و جەخت لەسەر ره‌وایی خواست و داواكارییەكانیان دەكاتەوە، لەو سۆنگه‌یه‌وه كه
ئەوان نوێنەری راستەقینەی ئەو توێژانەن و هەڵبژێردراوی راستەقینەو یاسایی ئەوانن و
داكۆیكاری مافه‌كانیان لە ئەنجومەنی زانكۆدا.
10- ئەنجوومەنی زانكۆ، داوا لە بەرپرسان و
لایەنە سیاسییەكانی شاری سلێمانی ده‌كات، لە پێناو بەرژەوەندی هەرێمی كوردستان
بەگشتی و شاری سلێمانی و دەورووبەری بەتایبەتی، كه وتاری میدیاییان هێورتر
بكەنەوە، به‌جۆرێك دوور بێت لە گیانی وروژاندن و ململانێی حزبی و ئەجێندای سیاسی،
كە دواجار هەمووان پێكەوە زەرەرمەندی سەرەكی ئەبین.
11- ئەنجوومەنی زانكۆ، داواكاری بۆ
مامۆستایان و خوێندكاران و فەرمانبەرانی خۆی بەتایبەتی و لایەن و فەرمانگەو
فەرمانبەرانی شاری سلێمانی بەگشتی هەیە، سەرەڕای داخوازییە پیشەیی و مەدەنییە
رەواكانیان، پێویستە دۆخەكە بە گیانی بەرپرسیارێتییەوە تەماشابكەن و دژو دووربن لە
هەر كردەوەیەكی نەخوازراوی شێواندنی باروودۆخی ئەمنی شارەكە.
لە
كۆتایداو وێڕای جەختكردنەوەمان لە ناوه‌ڕۆكی پەیامەكانی پێشوومان، ده‌توانین
دڵنیایی بده‌ین كه ئەنجومەنی زانكۆو ته‌واوی مامۆستایان و فەرمانبەران و
خوێندكاران بە دیدی بەرپرسیارێتییەوە ده‌ڕواننه دۆخەكە، چونكه له‌وه تێده‌گه‌ین،
كه هەمووان لەیەك كەشتیداین، ئەگەر هەر هەنگاو و تروسكاییەكی گەشبینانە بۆ
داخوازییە رەواكانمان هەبێت ئەوا بێگومانین بەبێ هیچ كێشەو ئاسته‌نگێك ئەم ساڵی
پرۆسەی خوێندن به‌رده‌وامی ده‌بێت و تەواو ده‌كرێت.
دروودو
نەمری بۆ شەهیدانی كوردستان و سەربەرزی بۆ خانەوادەی شەهیدان
سوپاس بۆ
خۆراگری مامۆستایان وفەرمانبەران وخوێندكاران
ئەنجومەنی
زانكۆی سلێمانی
14/2/2016